काठमाडौँ । सत्ता साझेदार दल नेकपा (एमाले) का सांसद देवराज घिमिरेले सभामुखको उम्मेदवार दर्ता गरेका छन् । एमालेमा घिमिरेले नयाँ वानेश्वरस्थित संघीय संसदको ल्होत्से हलमा पुगेर मनोनयन दर्ता गराएका हुन् ।
घिमिरेको उम्मेदवारीको प्रस्तावकमा एमालेका सुवासचन्द्र नेम्वाङ र समर्थकमा हितराज पाण्डे, रवि लामिछाने र राजेन्द्र लिङ्देन रहेका छन् । सत्ता गठबन्धन दलका तर्फबाट प्रतिनिधिसभाको सभामुखमा एमालेका घिमिरेले उम्मेदवारी दिएका हुन् ।
झापा निर्वाचन क्षेत्र नम्वर २ बाट प्रतिनिधिसभा सदस्यमा निर्वाचित सांसद घिमिरेलाई एमालेसहित माओवादी केन्द्र, रास्वपा र राप्रपाका नेताबीच भएको सहमतिअनुसार सभामुखको उम्मेदवार बनाइएको हो ।
सभामुखका लागि आज १ बजेदेखि ४ बजेसम्म मनोनयनको समय निर्धारण गरिएको छ । नेपाली कांग्रेसको पदाधिकारी बैठकले सभामुखमा उम्मेदवारी दिने निर्णय गरेको हो । आज बुधबार बिहान पार्टी सभापति शेरबहादुर देउवाको निवास धुम्बाराहीमा बसेको कांग्रेस पदाधिकारीहरुको बैठकले सभामुखमा उम्मेदवारी दिने निर्णय गरेको हो ।
कांगेसको पदाधिकारी बैठकमा महिलालाई सभामुख पदका लागि उम्मेदवार बनाउने विषयमा छलफल भएको हो । बैठकमा सहभागी एक पदाधिकारीका अनुसार अम्बिका बस्नेत, ईश्वरी न्यौपाने र सरिता प्रसाईंमध्ये एक उम्मेदवार बन्ने प्रबल सम्भावना रहेको छ ।
यो पनि पढ्नुहोस्
सभामुखको उम्मेदवार टुंगो लगाउनुअघि देउवालाई प्रचण्डको फोन, ओली शशंकित
कांग्रेसले महिलालाई सभामुखको उम्मेदवार बनाउने, यी हुन सम्भावित अनुहारहरु
