काठमाडौँ । नेपाली काँग्रेसका सभापति समेत रहेका प्रधानमन्त्री शेरबहादुर देउवाले यस वर्षको तिहारको भाइटीका लगाएनन् । भ्रातृशोकमा रहेका प्रधानमन्त्री देउवाले टीका नलगाएको प्रधानमन्त्री देउवाका स्वकीय सचिव भानु देउवाले जानकारी दिए ।
प्रधानमन्त्री देउवाका भाइ प्रेमबहादुर देउवाको निधन भएको एक वर्ष पुगेको छैन । भ्रातृशोकका कारण प्रधानमन्त्री देउवाले यो वर्षको विजयादशमीको टीका पनि लगाएका थिएनन् । भ्रातृशोकका कारण प्रधानमन्त्री देउवाको परिवारका अन्य सदस्यले पनि भाइटीका नलगाएका हुन् ।
डडेल्धुरा घर भएका प्रेमबहादुरको क्यान्सरको उपचारका क्रममा २०७९ साल जेठ २ गते सोमबार राति काठमाडौंको वीर अस्पतालमा निधन भएको थियो । यसअघिका वर्षमा प्रधानमन्त्री देउवाले आफ्नी बहिनी दुर्गा चन्दको हातबाट तिहारकाे भाइटीका लगाउने गरेका थिए ।
यस्तै राष्ट्रपति विद्यादेवी भण्डारीले यस वर्षको तिहारको भाइटीका लगाइनन् । राष्ट्रपति भण्डारीको माइती पाण्डे परिवारतर्फ जुठो परेकाले यसवर्ष उनको भाइटीका नभएको राष्ट्रपति कार्यालयले बताएको छ ।
यो पनि पढ्नुहोस्
राष्ट्रपति भण्डारीले यो वर्षको भाइटीका किन लगाइनन् ?
भ्रातृशोकका कारण प्रधानमन्त्री देउवाले लगाएनन् बडादसैंको टीका
