फाइल फोटो
काठमाडौँ । प्रमुख सत्तारुढ दल नेपाली कांग्रेसको पदाधिकारी बैठक जारी रहेको छ । प्रधानमन्त्रीको सरकारी निवास बालुवाटारमा समानुपातिक सूची सच्याउन कांग्रेसको पदाधिकारी बैठक जारी रहेको हो ।
कांग्रेस सभापति शेरबहादुर देउवा कांग्रेसको समानुपातिक सूची सच्याउन तयार भएपछि कांग्रेसको पदाधिकारी बैठक बसिरहेको हो । हिजो मंगलबार साँझ बसेको पदाधिकारी बैठकमा सबैलाई मिलाएर लैजान तयार भएको सभापति देउवाले प्रतिवद्धता जनाएका थिए ।
यसअघि तयार पारेको समानुपातिक सूचीमा संस्थापनइतर डा. शेखरकोइराला समूहले विरोध गरेपछि देउवा सूची सच्याउन तयार भएका हुन् । उनीहरुले सूची नसच्याए देशभर विद्रोह गर्ने चेतावनी समेत दिएका थिए ।
आगामी मङ्सिर ४ गते हुने निर्वाचनका लागि बन्दसूची सच्याउने अन्तिम म्याद र प्रत्यक्षतर्फको उम्मेदवारी मनोनयन गर्ने समय नजिकिँदै गर्दा दलहरू छलफलमा जुटेका हुन् ।
आसन्न निर्वाचनमा सिट बाँडफाँटको टुङ्गो लगाउन सत्तारुढ गठबन्धनको बैठक पनि बालुवाटारमा जारी रहेको छ । पाँचदलीय सत्ता गठबन्धनबीच आपसी सिट बाँडफाँटका विषयमा छलफल गर्न गठबन्धनका शीर्ष नेताको बैठक जारी रहेको हो ।
