काठमाडौँ । संघीय संसद्को प्रतिनिधि सभाअन्तर्गतको महाअभियोग सिफारिस समितिको बैठक जारी रहेको छ । महाअभियोग सिफारिस समितिको आज जारी बैठकमा सर्वोच्च अदालतका निलम्बित प्रधानन्यायाधीश चोलेन्द्रशमशेर जबरासँग बयान जारी रहेको छ ।
समितिको बैठक सिंहदरबारस्थित संसदीय समितिको सभाकक्षमा बयान लिन सुरु गरिएको हो । समितिले जबरालाई सोध्न ४३ वटा प्रश्न सोध्न तयार गरेकोमा अहिलेसम्म ११ वटा प्रश्नको मात्रै बयान लिएकोले अझै ३२ वटा प्रश्न बाँकी नै रहेका छन् ।
आजबाट १२ नम्वर प्रश्नबाट बयान सुरु गरिएको छ । आजको बैठकमा महाभियोग सिफारिस समितिले न्युनतम ५ देखि अधिकतम १० वटासम्म प्रश्नको बयान लिइने तयारी गरेको छ ।
जबराले प्रश्नको उत्तर दिने भन्दा पनि संसद्, सहकर्मी न्यायाधीशमाथि नै प्रश्न उठाउँदै आएका छन् । बयानका क्रममा जबराले महाअभियोग प्रस्ताव स्वत: निष्क्रिय भइसकेको दावी गर्दै आफूमाथि प्रतिशोधका आधारमा महाभियोग लगाइएको जिकिर गर्दै आएका छन् ।
११ सदस्यीय महाभियोग सिफारिस समितिमा एकवाल मियाँ, कल्याणीकुमारी खड्का, कृष्णभक्त पोखरेल, प्रमोद साह, मीनबहादुर विश्वकर्मा, यशोदा गुरुङ सुवेदी, रामबहादुर विष्ट, रेखा शर्मा, लालबाबु पण्डित, विष्णुप्रसाद पौडेल र डा. शिवमाया तुम्बाहाङ्फे सदस्य छन् ।
