काठमाडौँ । पूर्वउपप्रधानमन्त्री एवं नेकपा (माओवादी केन्द्र) का नेता नारायणकाजी श्रेष्ठले अमेरिकी सहयोग परियोजना मिलेनियम च्यालेञ्ज कर्पोरेशन (एमसिसी) सम्झौता प्रतिनिधिसभावाट पारित भएको दिनलाई कालो दिनको रुपमा टिप्पणी गरेका छन् ।
सामाजिक संजालमा आज राती लेख्दै संसदवाट एमसिसी सम्झौतामाथिको १२ बुँदे व्याख्यात्मक घोषणासहित प्रतिनिधिसभाको बैठकमा दफावार छलफल भएर संसदवाट अनुमोदन भएपछि नेता श्रेष्ठको यस्तो प्रतिक्रिया बाहिर आएको हो ।
उनले अन्तत: व्याख्यात्मक घोषणाको सुनियोजित भ्रम छर्दै आज राष्ट्रघाती एमसिसी सम्झौता संसदबाट अनुमोदन गराई छाडेकोमा आम देशभक्त नेपाली जनताले यसलाई कालो दिनको रुपमा लिनेछन् भनेर लेखेका छन् ।
नेता श्रेष्ठले सम्पुर्ण देशभक्त शक्तिहरु एकताबद्ध होऔं र नेपालको राष्ट्रिय सार्वभौमिकता, स्वाधीनता र हितको संघर्षलाई निरन्तर जारी राखौं भनेर आब्हान समेत गरेका छन् ।
व्याख्यात्मक टिप्पणीसहित एमसीसी अनुमोदन गर्ने गठबन्धनको तयारीप्रति यसअघि नै माओवादी केन्द्रका केहि नेताले असहमति जनाएका थिए । माओवादीका नेताहरु नारायणकाजी श्रेष्ठ, कृष्णबहादुर महरा, गिरिराजमणि पोखरेल, लीलामणि पोखरेल र देव गुरुङले असहमति जनाएका थिए ।
नेकपा (माओवादी केन्द्र) एमसिसी सम्झौतामा व्याख्यात्मक टिप्पणीसहित संसदबाट अनुमोदन गर्ने निर्णय गरेको थियो । आज बिहान प्रचण्ड निवास खुमलटारमा बसेको नेताहरुको बैठकले व्याख्यात्मक घोषणासहित एमसीसी अनुमोदन गर्ने निर्णय गरेको थियो ।
यसअघि आज बिहान पनि नेता श्रेष्ठले ट्वीटरमा लेख्दै ५ दलीय गठबन्धनमा अध्यक्ष प्रचण्डले व्याख्यात्मक घोषणासहित एमसिसी सम्झौता अनुमोदन गर्ने जानकारी गराएको निर्णयप्रति उनले गम्भीर असहमति र आपत्ति रहेको जनाएका थिए । उनले आज बिहानको पार्टीको छलफलमा आफू लगायत केही नेताहरुले मतभेद राखि सकेकोले यो महाधिवेशनको बिरुद्ध र गलत भएको धारणा व्यक्त गरेका थिए ।
गत फागुन ४ गते बुधबार काठमाडौं उपत्यकाका विभिन्न स्थानमा माओवादी केन्द्रका भातृ संगठनहरूले एमसिसीविरूद्ध प्रदर्शन गरेका थिए । माओवादी केन्द्रका नेता श्रेष्ठ पनि एमसिसीको विरोधमा प्रदर्शन गर्न सडकमा निस्किएका थिए । माओवादीभित्र श्रेष्ठले एमसिसी परियोजनाको विरोध गर्दै आएका थिए ।
उनले लेखेका छन्, ‘अन्तत ब्यख्यात्मक घोषणाको सुनियोजित भ्रम छर्दै आज राष्ट्रघाती एमसिसि सम्झौता संसदबाट अनुमोदन गराई छाडे । आम देशभक्त नेपाली जनताले यसलाई कालो दिनको रुपमा लिनेछन् । सम्पुर्ण देशभक्त शक्तिहरु एकताबध्द होऔं र नेपालको राष्ट्रिय सार्वभौमिकता, स्वाधीनता र हितको संघर्षलाई निरन्तर जारी राखौं ।’
अन्तत ब्यख्यात्मक घोषणाको सुनियोजित भ्रम छर्दै आज राष्ट्रघाती एमसिसि सम्झौता संसदबाट अनुमोदन गराई छाडे।आम देशभक्त नेपाली जनताले यसलाई कालो दिनको रुपमा लिनेछन्। सम्पुर्ण देशभक्त शक्तिहरु एकताबध्द होऔं र नेपालको राष्ट्रिय सार्वभौमिकता,स्वाधीनता र हितको संघर्षलाई निरन्तर जारी राखौं।
— NKShresthaPrakash (@nksthaprakash) February 27, 2022
यो पनि पढ्नुहोस्
एमसीसीको विरोध प्रदर्शन गर्न सडकमा उत्रिए नारायणकाजी श्रेष्ठ
