काठमाडौं । प्रतिनिधिसभाअन्तर्गतको कार्यव्यवस्था परामर्श समितिको बैठक आज बस्दै छ । सभामुख अग्निप्रसाद सापकोटाले आइतबार बिहान साढे ११ बजेका लागि बोलाएको कार्यव्यवस्था परामर्श समितिको बैठकमा आज पनि प्रमुख प्रतिपक्ष दल नेकपा एमाले नजाने भएको छ ।
सभामुख सापकोटाले बोलाएको कार्यव्यवस्था परामर्श समितिको बैठकमा एमाले भने अनुपस्थित हुँदै आएको छ । एमालेले आफूले उठाएका माग सम्बोधन नभएकाले बैठकमा सहभागी हुने वातावरण बनिनसकेको बताएको छ ।
सभामुख सापकोटाले आफूले कारबाही गरेका १४ जना संसदलाई निष्काशन गरेको सूचना नटाँसेको भन्दै एमालेले संसदको बैठक अवरोध जारी राख्नुका साथै सभामुखले बोलाएको कार्यव्यवस्था परामर्श समितिको बैठक बहिस्कार गर्दै आएको छ ।
आज प्रतिनिधिसभाको बैठक आज दिउसो १ बजे बस्दैछ । प्रतिनिधिसभाको बैठकको बैठकअघि सभामुख सापकोटाले कार्यव्यवस्था परामर्श समितिको बैठक बोलाएका हुन् ।
आज बस्ने कार्यव्यवस्थाको परामर्श समितिको बैठकले प्रतिनिधिसभा बैठकका कार्यसूची तय गर्नेछ । आज बस्न लागेको कार्यव्यवस्थाको बैठकमा संसद्मा जारी अवरोधलाई हटाउने विषयमा पनि छलफल हुने बुझिएको छ ।
