फाइल फोटो 
काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले सत्ता गठबन्धनको बैठक बसेर भोलि नै मन्त्रिपरिषद् विस्तार हुने बताएका छन् । अव बन्न लागेका थप नयाँ मन्त्रीहरुमा माओवादी केन्द्रले अझसम्म मन्त्री नभएका नयाँ अनुहारलाई प्राथमिकतामा राखेको छ ।
आज बुधबार दिउँसो पार्टी केन्द्रिय कार्यालय पेरिसडाँडामा बसेको माओवादी केन्द्रको स्थायी समिति बैठकमा प्रचण्डले बिहीबार सत्ता गठबन्धनमा रहेका दलका शीर्ष नेताको बैठक बस्ने र मन्त्रिपरिषद् विस्तार हुने ‘ब्रिफिङ’ गरेका हुन् ।
सत्ता गठबन्धनमा भएको सहमतिअनुसार माओवादी केन्द्रले ५ मन्त्री र १ राज्य मन्त्री पाउँनेछ । माओवादी केन्द्रबाट जनार्दन शर्मा अर्थमन्त्री र पम्फा भुसाल उर्जामन्त्री भइसकेका छन् भने बाँकी ३ जना मन्त्री र १ जना राज्यमन्त्रीको थपिनेछन् ।
प्रचण्डले केही कानुनी अड्चनले मन्त्रिपरिषद् विस्तारमा विलम्व भएको बताउदै अव कानुनी अवरोधहरू पनि हट्ने प्रक्रियामा रहेकाले भोलि बिहीबार गठबन्धनको बैठक बसेर मन्त्रिमण्डललाई पूर्णता दिने तयारी भएको उनले ब्रिफिङ गरेका हुन् ।
मन्त्रीका विषयमा भने आजको बैठकमा छलफल नभएको एक स्थायी कमिटी सदस्यले बताए । आजको बैठकमा पार्टीको सम्मेलन लगायत विषयमा छलफल भएको उनले बताए ।
ती स्थायी कमिटी सदस्यका अनुसार मन्त्रालयको भागबण्डा मिलेपछि मात्रै पार्टीबाट मन्त्री हुनेको नाम टुंगो लाग्नेछ । मन्त्रीको नामावली टुंगो लगाउँने जिम्मेवारी अध्यक्ष प्रचण्डलाई दिइएको छ ।
यो पनि पढ्नुहोस्
माओवादीको स्थायी समिति बैठक बस्दै, सरकारमा सहभागी हुने मन्त्री छान्ने
