बुटवल । लुम्बिनीका मुख्यमन्त्री कुलप्रसाद केसीले प्रदेशसभावाट विश्वासको मत पाएका छन् । लुम्बिनी प्रदेशसभाका सभामुख पूर्ण बहादुर घर्तीले प्रदेशसभाको बैठकमा मुख्यमन्त्री केसीले संविधानको धारा १८८ को उपधारा १ र प्रदेश सभा नियमावली २०७४ को नियम १४३ को उपनियम ४ बमोजिम विश्वासको मत पाएको घोषणा गरेका छन् ।
प्रमुख प्रतिपक्ष दल नेकपा एमालेको अनुपस्थितीमै आज सोमबार प्रदेशसभा बैठकमा आफूलाई प्रदेशसभाको विश्वास छ भनी मुख्यमन्त्री केसीले राखेको प्रस्तावको पक्षमा ४२ र विपक्षमा शून्य मत परेको छ भने १ मत भने तटस्थ देखिएको छ ।
लुम्बिनी प्रदेशसभामा रहेका ८० जना सांसदहरुमध्ये आजको बैठकमा सभामुख घर्तीबाहेक ४३ जना उपस्थित भएका थिए भने एमालेका ३७ जना सांसदहरू अनुपस्थित भएका थिए । एमालेले आफ्नो पार्टीले कारवाही गरेका सांसदहरु अजयबहादुर शाही र बिमला वलीलाई पदमुक्त गर्नुपर्ने माग राख्दै आएको छ ।
मुख्यमन्त्री केसीलाई नेपाली कांग्रेस, नेकपा (माओवादी केन्द्र), जनता समाजवादी पार्टी (जसपा) र राष्ट्रिय जनमोर्चाका सांसदले मत दिएका थिए । तर प्रतिपक्ष नेकपा एमालेले सदन बहिस्कार गरेका कारण पार्टीका ३७ सांसद मत विभाजनमा उपस्थित भएनन् ।
मुख्यमन्त्री केसीलाई नेपाली कांग्रेसका १९ जना, नेकपा (माओवादी केन्द्र) का १८ जना, जनता समाजवादी पार्टी (जसपा) का ३ जना, राष्ट्रिय जनमोर्चाका १ जना र सूर्य चिन्हबाट निर्वाचित एक स्वतन्त्र समूहका १ जना सांसदले मत दिएका हुन् ।
यो पनि पढ्नुहोस्
लुम्बिनीका मुख्यमन्त्रीले ल्याए ‘समृद्ध लुम्बिनी, आत्मनिर्भर लुम्बिनी’ को नारा
लुम्बिनीमा प्रतिपक्ष एमालेको अनुपस्थितिमै मुख्यमन्त्री केसीले मागे विश्वासको मत
एमाले विरोधका बाबजुद लुम्बिनीमा मुख्यमन्त्री केसीले आजै विश्वासको मत लिने
