फाइल फोटो 
काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमाले वरिष्ठ नेता माधवकुमार नेपाललाई गुहार मागेका छन् । स्रोतका अनुसार प्रचण्डले ओलीसँग नमिल्न नेपाललाई आग्रह गरेका छन् ।
जनकपुरबाट काठमाडौं फर्किएका प्रचण्ड नेता नेपाललाई भेट्न कोटेश्वर पुगेका हुन् । एमाले विवाद कायमै रहँदा नेता नेपालसहित विपक्षी गठबन्धन बनेको छ । एमालेको विवाद मिलेर आजै अध्यक्ष केपी शर्मा ओली र नेता नेपालको संयुक्त विज्ञप्ति आउने चर्चा भएपछि प्रचण्ड नेपाल निवास कोटेश्वर पुगेका हुन् ।
उक्त भेटघाटमा आफूलाई एक्लो बनाएर ओलीसँग नमिल्न आग्रह गर्दै बरू बृहत कम्युनिष्ट एकताको लागि मोर्चा बनाएर अघि बढौँ भन्ने प्रस्ताव राखेको बुझिएको छ । एमालेको विवाद मिल्न खोजेको समयमा यसअघि पनि प्रचण्ड छटपटिएका हुन् ।
सत्तारुढ दल नेकपा एमालेका दुई समुहहरुको प्रतिनिधित्व गरेका केपी शर्मा ओली समूह र माधव नेपाल समूह मिल्ने शुभ संकेत देखेपछि माओवादी केन्द्रका अध्यक्ष पुष्पकमल दाहाल ‘प्रचण्ड’ लाई तनाव सिर्जना भएको छ ।
नेकपा एमालेमा एकता कायम गर्न बनेको कार्यदलको बैठक सिंहदरबारमा जारी रहेको बेला जनकपुरबाट काठमाडौं फर्किएपछि सीधै प्रचण्ड नेपाललाई भेट्न एकाएक कोटेश्वर पुगेलाई एमालेको ओली समूहले अर्थपूर्ण रुपमा लिएको हो ।
यसअघि पार्टीमा समानान्तर कमिटीको अभ्यासको अनुभव लिएर जसरी भएपनि ओलीसँग सम्वन्धविच्छेद गरेर नयाँ कम्युनिष्ट पार्टीको सपना देखेका नेपाललाई एमालेको एकता जोगाउन गठित कार्यदलका सदस्यले भेटेर बल्ल-बल्ल मनाएर सहमति नजिक पुगेको बेला नेपाललाई फेरि भड्काउन प्रचण्ड उनको निवास कोटेश्वर त पुगेका होइनन् भन्ने आशंका ओली समूहका नेता-कार्यकर्तामा छाएको छ ।
