काठमाडौँ । नेकपा (एमाले) का महासचीव ईश्वर पोखरेल र खनाल-नेपाल समूहको प्रचार विभाग प्रमुख योगेश भट्टराईको बक्तव्य र धारणाले आम पार्टीका कार्यकर्ताहरु नै कसको कुरा पत्याउने र मान्ने भनेर रणभुल्लमा परेका छन् ।
झलनाथ-माधव समूहका नेता भट्टराईले हिजो ललितपुरका आयोजित पत्रकार सम्मेलनमा बदलिँदो परिस्थितिमा छलफल गर्न, एकीकृत धारणा बनाउन र देशव्यापी रुपमा पार्टी पङ्क्तिलाई त्यस आधारमा अघि बढाउनका लागि राष्ट्रिय कार्यकर्ता भेला गर्न लागेकोले उपस्थित हुन पार्टीका सवै नेताहरु र कार्यकर्ताहरुलाई आग्रह गरे ।
हिजो सो पत्रकार सम्मेलन भएको बेलुकी नेकपा (एमाले) का महासचीव ईश्वर पोखरेलले एक प्रेस बिज्ञप्ति जारी गर्दै नेपाल कम्युनिष्ट पार्टी नेकपा (एमाले) को चैत ४ र ५ गते राष्ट्रिय कार्यकर्ता भेला आयोजना गर्ने भनी प्रचारित सूचनाप्रति गम्भीर ध्यानाकर्षण भएको बताएका थिए । एमालेको तर्फवाट त्यस्तो त्यस्तो कुनै पनि भेला आयोजना नगरिएको पोखरेलले प्रष्ट पार्दै भेलामा सहभागी हुनेहरुलाई कारवाही हुन सक्ने संकेत पोखरेलले गरेका थिए ।
प्रधानमन्त्रीकै सामुन्ने पोखरेल र भट्टराईबीच चर्काचर्की
प्रधानमन्त्री निवास बालुवाटारमा प्रधानमन्त्री केपी शर्मा ओलीकै सामुन्ने सिसिएमसीका संयोजक समेत रहेका तत्कालिन रक्षामन्त्री ईश्वर पोखरेल र तत्कालिन संस्कृति पर्यटन तथा नागरिक उड्डयनमन्त्री योगेश भट्टराईबीच भनाभन भएको थियो । कोरोना संक्रमणको फैलँदो अवस्थालाई कसरी नियन्त्रणमा राख्ने भने विषयमा छलफल गर्न बालुवाटार पुगेका दुई मन्त्रीबीच भनाभन भएको थियो ।
गत भदौमा नेपाल एयरलाइन्सको जहाज नेपालबाट दुबई प्रस्थान गरेपछि कोभिड-१९ संकट व्यवस्थापन सञ्चालन केन्द्रले अन्तिम समयमा विदेशबाट नेपाली ल्याएर राख्न नसकिने निर्णय गरेपछि दुबईबाट नेपाल आउने तयारीमा रहेका २३० जना नेपाली नागरिक लिन गएको उक्त जहाज रित्तै फर्कियो ।
मन्त्रिपरिषद्ले गरेको निर्णय विपरीत केन्द्रले यस्तो निर्णय गरेपछि जहाज रित्तो फर्किएको विषयलाई लिएर तत्कालिन कोभिड-१९ सङ्कट व्यवस्थापन सञ्चालन केन्द्रका तत्कालिन संयोजक पोखरेल र तत्कालिन नागरिक उड्डयनमन्त्री भट्टराईबीच बैठकमै चर्काचर्की परेको थियो ।
स्रोतका अनुसार त्यसपछि केन्द्रको बैठकमा संयुक्त अरब ईमिरेट्स युएईमा उद्धारका लागि गएको नेपाल एअरलाइन्सको जहाज रित्तै फर्काएपछि भट्टराई पोखरेलसँग क्रुद्ध हुन पुगेका थिए । तर भट्टराई जङ्गिएपछि पोखरेल मौन बसेका थिए ।
स्रोतका अनुसार होटल र क्वारेन्टिनको प्रबन्ध राम्रो नभएको भन्दै केन्द्रका संयोजक पोखरेलले उद्धार उडान नभर्ने निर्णय गरेका थिए । निजी कम्पनीमा यात्रु ल्याउन नेपाल एअरलाइन्सको विमान रित्तै फर्काएको पर्यटन मन्त्रालय स्रोतको भनाइ छ ।
योगेश र ईश्वरको जम्काभेट : एक अर्कासँग बोल्दै बोलेनन्
गत फागुन १९ गते नयाँ बानेश्वरस्थित सिभिल अस्पतालको प्राङ्गणमा सरकारका उपप्रधानमन्त्री समेत रहेका ईश्वर पोखरेल पनि भ्याक्सिन लगाउन पुगेका थिए । प्रतिनिधि सभाका सभामुख अग्निप्रसाद सापकोटा, नेकपा प्रचण्ड नेपाल समूहमा दुबै अध्यक्ष माधवकुमार नेपाल र पुष्पकमल दाहाल प्रचण्डले उनीभन्दा पहिल्यै खोप लगाएर फर्किसकेका थिए ।
खोप लगाएपछि मन्त्री पोखरेल आराम गर्ने टेन्टभित्र छिरे । जहाँ अन्य सांसदसँगै तत्कालिन नेकपा प्रचण्ड-नेपाल समूहका नेता योगेश भट्टराई बसेका थिए । उनी बसे सँगैको कुर्सीमात्र खाली भएका कारण पोखरेल पनि सोही कुर्सीमा आरामका लागि बस्न पुगे ।
प्रधानमन्त्रीले प्रतिनिधिसभा विघटन गरेपछि मन्त्रीबाट राजीनामा गरेका योगेश भट्टराई र बहालवाला उपप्रधानमन्त्री भेटभएपछि केही कुराकानी हुन्छ कि ? प्रतिनिधि सभा बैठकको पूर्वसन्ध्यामा पार्टीको दुई समूहमा बाँडिएका दुई नेताको भेटमा कुनै अनौपचारिक भलाकुसारी होला कि भन्ने जिज्ञासाका साथ सञ्चारकर्मीहरूले उनीहरुतिर क्यामेरा सोझ्याइरहेका थिए । तर झन्डै २० मिनेट वल्लो–पल्लो कुर्सीमा बसेका दुई नेताबीच कुनै संवाद भएन ।
हिजो पत्रकार सम्मेलनमा भट्टराईको भनाई : कारबाहीका लागि हामी लामबद्ध छौं
नेकपा एमालेका सचिव समेत रहेका भट्टराईले पार्टी अध्यक्ष एवं प्रधानमन्त्री केपी शर्मा ओलीलाई धम्कीको भाषा नबोल्न चेतावनी दिएका थिए । हिजो नै मंगलबार बालुवाटारमा आयोजित चियापान समारोहमा एमाले अध्यक्ष केपी ओलीले गुटगत भेला गरे कारबाही हुनसक्ने चेतावनी दिएका थिए ।
खनाल-नेपाल समूहका प्रचार विभाग प्रमुख भट्टराईले राष्ट्रिय कार्यकर्ता भेलाबारे जानकारी दिन आयोजित पत्रकार सम्मेलनमा हिजो पार्टी कठिन अवस्थाबाट गुज्रिरहेको घडीमा धैर्य र संयमताका साथ पार्टीको सुदृढ एकता र विधान सम्मत सञ्चालनका लागि आ-आफ्नो ठाउँबाट योगदान गर्न पार्टीका सबै नेता, कार्यकर्ता, समर्थक र शुभेच्छुकमा आग्रह गरेका थिए ।
राष्ट्रिय कार्यकर्ता भेलामा पार्टीलाई सुदृढ, एकताबद्ध, क्रियाशील र विधान सम्मत रुपमा अघि बढाउने सम्बन्धमा व्यापक छलफल गर्न गइरहेको बताएका थिए । उनले ओलीलाई धम्की भाषा प्रयोग नगर्न चेतावनी दिएका थिए ।
उनले इतिहासको कठघरामा उभिँदा आइपर्न सक्ने प्रश्नको उत्तर दिने हिम्मत राखेर अघि बढ्न प्रधानमन्त्री ओलीलाई सुझाव दिए । इतिहासले सोधेका प्रश्नको उत्तर दिन असमर्थ भएको बेला इतिहासले ओलीमाथि कठोर कारबाही गर्ने उनले बताए ।
उनले पार्टीको इतिहासतर्फ फर्केर हेर्न र दललाई सुदृढ बनाउने काममा लाग्न पनि उहाँले प्रधानमन्त्री ओलीलाई सुझाव दिए । उनले बुधबार काठमाडौंमा हुन लागेको राष्ट्रिय कार्यकर्ता भेलाको प्रमुख आतिथ्यता ग्रहण गर्न प्रधानमन्त्रीलाई अनुरोध गरे । देशभरिबाट आएका कार्यकर्ता नेकपा एमालेकै भएको र पार्टी अध्यक्षको हैसियतले आफ्ना कार्यकर्ताको भेलाको प्रमुख आतिथ्यता ग्रहण गरी सम्बोधन गर्न आग्रह गरे ।
गुटगत भेला नगर्न पोखेरेलको निर्देशन
नेकपा (एमाले) को झलनाथ-माधव समूहले यही चैत ४ र ५ गते राजधानीमा राष्ट्रिय कार्यकर्ता भेलाप्रति नेकपा (एमाले) का महासचीव ईश्वर पोखरेलले कडा आपत्ति जनाएका थिए । पोखरेलले गुटगत भेला नगर्न नेता कार्यकर्तालाई निर्देशन दिएका थिए ।
पोखरेलले हिजो साँझ एक प्रेस बिज्ञप्ति जारी गर्दै नेपाल कम्युनिष्ट पार्टी नेकपा (एमाले) को सो राष्ट्रिय कार्यकर्ता भेला आयोजना गर्ने भनी प्रचारित सूचनाप्रति गम्भीर ध्यानाकर्षण भएको बताएका थिए । नेकपा एमालेको तर्फवाट त्यस्तो त्यस्तो कुनै पनि भेला आयोजना नगरिएको पोखरेलले प्रष्ट पारेका छन् । भेलामा सहभागी हुनेहरुलाई कारवाही हुन सक्ने संकेत पोखरेलले गरेका छन् ।
भट्टराईले आज गरेको आग्रह
भट्टराईले आज सामाजिक संजालमा लेख्दै छुलिया ग्यांङको कुप्रचारको भ्रममा नपर्न नेताहरु र कार्यकर्ताहरुलाई आग्रह गर्दै नेकपा एमालेको आज र भोलिको राष्ट्रिय भेला तोकिएको समय र स्थानमा हुने प्रष्ट पारे ।
उनले यस्तो लेखेका छन्, छुलिया ग्यांङको कुप्रचारको भ्रममा नपर्नु होला । नेकपा एमालेको आज र भोलीको राष्ट्रिय भेला तोकिएको समय र स्थानमा हुनेछ ।’
निष्कर्ष
हुनपनि यी दुवै जना नेताहरुवीच धेरै समय अघिदेखि चरम शीतयुद्ध चल्दै आएको थियो र छ पनि । विगतमा नेकपा एकीकरण भएपछि एकाएक पुष्पकमल दाहाल ‘प्रचण्ड’ तिर लागेका नेकपा एमालेका नेता माधव नेपाल र प्रधानमन्त्री समेत रहेका केपी शर्मा ओलीवीच पानी बाराबारको सम्वन्ध फेरि पुनर्मिलन हुने संकेत देखिएको थियो ।
प्रधानमन्त्री ओलीले २८ गते गरेको निर्णयको प्रतिक्रियामा नेपाल समूहले समानान्तर विभागहरू गठन गरेको थियो भने चैत ४ र ५ गते राष्ट्रिय भेला बोलाएको छ । प्रधानमन्त्री ओलीले चैत ७ गतेका लागि केन्द्रीय समिति बैठक बोलाएका छन् ।
अन्तत: विभाजनको संघारमा पुगेका सत्तारुढ दल नेकपाका यी दुवै समूहका शीर्ष नेताहरुवीच भेटघाट भएपछि आम नेता र कार्यकर्तामा छाएको खुशियाली त्यसको १ दिनपछि नै चरम निरासा छाएको छ । उक्त पार्टीका कार्यकताहरु र आम जनताले कुनै पार्टीको विभाजन रुचाउदैनन् । जनताको चाहना भनेको देशमा राजनीतिक स्थायित्व होस् भन्ने नै हो ।
ठुलो दुर्घटना हुनवाट अव चाहि एमाले बचेको हो कि भन्ने आम जनता र यस पार्टीका कार्यकर्ताको चाहना विपरित फेरी एमाले विभाजनको संघारमा पुगेको छ । हुनपनि सवै नेपाली जनतले देशमा राजनीतिक स्थायित्व चाहेका छन् ।
हुनपनि एउटै खाटमा सुतेपछि कहिलेकाहीं गोढाले लाग्नु स्वाभाविक हो । आपसी समझदारीवाट पार्टीमा देखिएको विवाद समाधान गर्नु देशकै लागि सुखद कुरा हुनेछ । बिगतमा एकअर्काले गरेका गल्ती महसूस गरेर हातेमालो गरेर अघि बढ्नु नै आजको आवश्यकता हो।
यो पनि पढ्नुहोस्
खनाल-नेपाल समूहको राष्ट्रिय कार्यकर्ता भेला आजदेखि शुरु
खनाल-नेपाल समूहको राष्ट्रिय कार्यकर्ता भेलाप्रति ओली समूहको कडा आपत्ति
