काठमाडौं । सत्तारुढ दल नेपाल कम्युनिष्ट पार्टी (नेकपा) का अध्यक्ष तथा प्रधानमन्त्री केपी शर्मा ओलीले निर्वाचन आयोगलाई निर्वाचन प्रक्रिया निरन्तर अगाडि बढाउन आग्रह गरेको प्रधानमन्त्रीका प्रेस सल्लाहकार सूर्य थापाले जानकारी दिएका छन् ।
आज निर्वाचन आयोगको कार्यालय पुगेर प्रधानमन्त्री ओलीले सरकारले आगामी वैशाख १७ र २७ गतेलाई तोकिएको निर्वाचन जसरी पनि सम्पन्न गर्न निर्वाचन आयोगलाई आग्रह गरेका हुन् ।
मन्त्रिपरिषदले हिजो गरेको निर्णय अनुसार पहिलो र दोस्रो चरणको चुनाव हुने जिल्लाको बारेमा समेत छलफल गर्न ओली सहित उनको समूहका नेताहरु आयोग गएका हुन् । ओली समूहका नेता सुवासचन्द्र नेम्वाङ, विष्णु पौडेल लगायतका नेताहरु आयोग पुगेका थिए ।
थापाका अनुसार प्रधानमन्त्री ओली निर्वाचन आयोगको कार्यालय पुगेर निर्वाचनको तयारीबारे जानकारी लिएपछि निर्वाचन तयारी निरन्तर अघि बढाउन सुझाव दिएका थिए भने प्रमुख निर्वाचन आयुक्त दिनेश कुमार थपलियाले पनि निर्वाचनको तयारीलाई निरन्तर अगाडि बढाउने बताएको उनले जानकारी दिए ।
थापाका अनुसार निर्वाचनको तयारीका विषयमा छलफल गर्दै आयोगको तयारीलाई प्रधानमन्त्रीले धनयवाद समेत दिएका छन् । तर यसअघि नेकपा विवादपछि प्रचण्ड-नेपाल समूहले निर्वाचन हुन नसक्ने भन्दै निर्वाचन आयोगलाई निर्वाचन प्रक्रिया अघि नबढाउन आग्रह गरेको थियो ।
थापाका अनुसार प्रधानमन्त्री ओलीलाई आयोगको तयारीबारे प्रमुख निर्वाचन आयुक्त दिनेश थपलिया र आयुक्तहरुले आयोगको तयारी सुरक्षा, बजेट लगायतका विषयमा जानकारी गराएका थिए ।
थापाले प्रधानमन्त्रीसँग आयोगले दल विवादबारे कुनै छलफल नभएको पनि जानकारी दिए । उनले माघ ११ गते गरेको निर्णय र माघ २० मा परेको निवेदनबारे सामान्य जानकारी मात्रै गराएको थापाले बताए ।
गत माघ १६ गते नेकपाका दुवै समूहलाई आयोगले बोलाएको थियो । आयोगले बोलाएपछि प्रचण्ड-नेपाल समूह आयोग कार्यालय पुगेर आधिकारिकता दाबी गरेका थिए तर ओली भने गएका थिएनन् । नेकपाका दुवै समूहका नेताहरुले आफूहरु मूल पार्टी रहेको दाबी गर्दै आएपनि आयोगले दुवै समूहको दाबी नपुगेको भन्दै आएको छ ।
गत पुस ५ गते प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गर्दै आगामी बैशाख १७ र २७ गते निर्वाचन मिति घोषणा गरेकी थिइन् ।
