काठमाडौं । सरकारले यातायात व्यवस्था विभागको महानिर्देशकको हेरफेर गरेको छ । भौतिक पूर्वाधार तथा यातायात मन्त्रीस्तरीय निर्णयबाट विभागको नयाँ महानिर्देशकमा सुरेश राउतलाई ल्याउने निर्णय भएको छ ।
शुक्रबारको मन्त्रीस्तरीय निर्णयबाट महानिर्देशकमा राउतलाई ल्याउने निर्णय भएको हो । प्रदेश १ मा कार्यरत राउतले आज (सोमबार) बाट पदीय जिम्मेवारी सम्हाल्ने जनाइएको छ ।
हाल विभागको महानिर्देशकको जिम्मेवारी सम्हाल्दै आएका नमराज घिमिरेलाई वन तथा वातावरण मन्त्रालय सरुवा गरिएको छ । उनी २ चैत २०७७ मा महानिर्देशकको जिम्मेवारीमा यातायात व्यवस्था विभागमा सरुवा भएका थिए ।
उनले महानिर्देशकको जिम्मेवारी सम्हालेपछि परीक्षणकालीन लाइसेन्स वितरण थालिएको थियो । जसका कारण समयमा नै सेवाग्राहीले लाइसेन्स नपाए पनि रसिदको भरमा हिँड्नुपर्ने समस्या हटेको थियो । बाग्मती प्रदेशअन्तर्गतका कार्यालयबाट एक वर्षको परीक्षणकालीन लाइसेन्स दिने गरेको थियो ।
पछिल्लोपटक प्रदेश मातहतका कार्यालयमध्ये हेटौडा कार्यालयबाहेक अन्य कार्यालयले बजेटको अभाव देखाउँदै परीक्षणकालीन लाइसेन्स सेवा बन्द गरेका थिए ।
घिमिरेले आफूले जिम्मेवारी सम्हालेपछि ६ लाख स्मार्ट लाइसेन्स प्रिन्ट गरेर वितरण गरेको, नयाँ अनलाइन प्रणाली लागू गरेको बताएका छन् । उनले नयाँ प्रणालीमा १५ दिनभित्र सेवाग्राहीले भिजिट डेट पाउनेगरी सेवामा सुधार गरेको दाबीसमेत गरेका छन् ।
विभागमा महानिर्देशक हेरफेर हुने गरे पनि त्यहाँको समस्या भने समाधान हुने गरेको छैन ।
सेवाग्राहीले लाइसेन्स परिक्षा पास गरेको दुई वर्षसम्म लाइसेन्स पाउन सकेका छैनन् । यातायात कार्यालयमा सानो कामका लागि पनि सेवाग्राहीले घण्टौंसम्म लाइन बस्नुपर्ने बाध्यता रहेको छ । सरकारी ढिलासुस्तीका कारण सेवा पाउन घण्टौं लाइन बस्नुपर्ने र समयमा सेवा पनि उपलब्ध नहुने सेवाग्राहीको गुनासो रहेको छ ।
सेवाग्राहीले यातायात कार्यालयमा बिचौलियाको बिगबिगी हुने गरेको र सेवाग्राहीलाई भन्दा उनीहरूको कामलाई प्राथमिकता दिने गरेको गुनासोसमेत गरेका छन् । यो समाचार राजधानी दैनिकवाट साभार गरिएको हो । यो समाचार आजको राजधानी दैनिकमा प्रकाशित छ ।
