काठमाडौं, ९ असोज । नेपालमा भूकम्पपछिको पुनर्निर्माणका लागि भारतले मंगलबार १ अर्ब ५४ करोड रुपियाँ प्रदान गरेको छ । नेपालस्थित भारतीय राजदूतावासले बिहीबार जारी गरेको विज्ञप्तिअनुसार नियोग उप–प्रमुख नामग्य खम्पाले अर्थ मन्त्रालयका सचिव शिशिरकुमार ढुंगानालाई भारत सरकारले आवास तथा विद्यालय पुनर्निर्माणका लागि गरेको प्रतिबद्धताअनुरूप नेरु १ अर्ब ५४ करोड ९भारु ९६ करोड० को चेक हस्तान्तरण गर्नुभएको हो ।
भारत सरकारले आवास परियोजनाअन्तर्गत नेपाललाई १५ करोड अमेरिकी डलर बराबर अनुदान सहायता उपलब्ध गराउने प्रतिबद्धता गरेको थियो । चेक हस्तान्तरणसँगै भारतले आवास क्षेत्रको पुनर्निर्माणका लागि नेपाल सरकारलाई अनुदान सहायताको ७ करोड २० लाख अमेरिकी डलर बराबर उपलब्ध गराइसकेको पनि विज्ञप्तिमा जनाइएको छ ।
भारत सरकारले गोरखा र नुवाकोट जिल्लाका ५० हजार निजी आवास पुनर्निर्माणका लागि गरेको प्रतिबद्धतामध्ये ९२ प्रतिशत घरधुरीको निर्माण सम्पन्न भइसकेको बताइएको छ । यस्तै भारत सरकारले ५ करोड अमेरिकी डलर अनुदान सहायताअन्तर्गत ७० वटा विद्यालय र एक पुस्तकालयको पुनर्निर्माणका लागि पनि सहयोग प्रतिबद्धता गरेको छ ।
यसमध्ये भारत सरकारले विद्यालय पुनर्निर्माण तर्फको ४२ लाख अमेरिकी डलर बराबरको पहिलो किस्ता नेपाल सरकारलाई उपलब्ध गराइसकेको छ । ‘भूकम्पपछिको पुनर्निर्माणतर्फको प्रयासमा नेपाल सरकार तथा नेपाली जनतालाई निरन्तर सहयोग गर्न भारत सरकार प्रतिबद्ध रहन्छ।’ –विज्ञप्तिमा भनिएको छ । यो खबर आजको समाचारपत्रले प्रकाशन गरेको छ ।
