१० जेठ, गौशाला । प्रदेश नं २ का आन्तरिक मामिला तथा कानूनमन्त्री ज्ञानेन्द्रकुमार यादवले आज महोत्तरीको जलेश्वरस्थित कारागारको स्थलगत निरीक्षण गर्नुभएको छ ।
महोत्तरी, धनुषा र सर्लाहीको संयुक्त कारागारका रुपमा रहेको जलेश्वर कारागारमा रहेका कैदीबन्दीको अवस्थाबारे जानकारी लिन मन्त्री यादवले स्थलगत निरीक्षण गर्नुभएको हो ।
निरीक्षणपछि मन्त्री यादवले कारागारको भौतिक संरचना अति जीर्ण, बाढीको बेला डुबानमा पर्ने, अत्यधिक गर्मी, बर्सात र अन्य विभिन्न समस्याको सामना गर्दै कष्टकर जीवन बिताउनु परेको बताउनुभयो । उहाँले कैदीको सुरक्षित बसोबास, क्षमता अभिवृद्धि तथा सीप विकासका कार्यक्रम चाँडै व्यवस्थापन गर्ने बताउनुभयो ।
मन्त्री यादवले समस्या समाधानका लागि पहल गर्ने बताउनुभयो ।
उक्त अवसरमा जेलर शोभेन्द्र ठाकुरले मन्त्री यादवलाई कारागारका विभिन्न समस्याबारे अवगत गराउनुभएको थियो । (रासस)
