जनकपुर । ‘कुमारी आमा’ का रुपमा चिनिएकी महोत्तरी जलेश्वरकी निहारिका राजपुत र शिवराज श्रेष्ठले अन्ततः विवाह गरेका छन् । निहारिका र शिवराज विवाह बन्धनमा बाँधिएका छन् ।
आज शुक्रबार जनकपुरधामको जानकी मन्दिरमा गएर दुई जनाले विवाह गरेका हुन् । उनीहरुले जिल्ला अदालत धनुषामा विवाह दर्तासमेत गराइसकेका छन् ।
गत माघ १७ गते मंगलबार निहारिका र श्रेष्ठबीच जिल्ला अदालत धनुषामा मिलापत्र भएको थियो । अदालतमा भएको मिलापत्रअनुसार उनीहरु एक-अर्कामा श्रीमान्-श्रीमतीका रुपमा संगै बस्न राजी भएका थिए ।
जिल्ला न्यायाधीश ब्रिजेस प्याकुरेलको इजलासले निहारिका र शिवराज सहमति गरेर अदालत पुगेपछि मिलापत्रको आदेश दिएका हुन् । दुवैले मिलापत्रमा ३ वर्ष पहिलेदेखिको प्रेमलाई विवाहमा परिणत गरेको उल्लेख गरेका थिए । निहारिकाले शिवराजबाट आफू बलात्कृत भएको भन्दै जिल्ला अदालत धनुषामा मुद्दा दायर गरेकी थिइन् । तर उक्त मुद्दामा अदालतले शिवराजलाई सफाइ दिएको थियो ।
अहिले उनीहरुका एक छोरा पनि छन् । २०७७ भदौ ५ गते छोरा बिहान श्रेष्ठको जन्म भएको थियो । यसअघि यी सन्तान शिवराजकै भएको भन्दै निहारिकाले डीएनए परीक्षण गर्न माग गरेकोमा डीएनए परीक्षण गर्दा निहारिकाका छोराको डीएनए शिवराजसँग मिलेको थियो ।
अनशन बसेकोकै क्रममा निहारिकाले राष्ट्रपति भवन अगाडि आत्मदाह गर्ने प्रयास गरेपछि मुद्दा फास्ट्र्याकमा अघि बढेको थियो । प्रहरीले आरोपित शिवराजलाई यसअघि नै पक्राउ गरेको थियो । निहारिकाको मुद्दा हाल उच्च अदालत जनकपुरमा विचाराधीन छ ।
यो पनि पढ्नुहोस्
निहारिका र शिवराजबीच अदालतमा मिलापत्र : अब श्रीमान्-श्रीमती भएर बस्ने
निहारिका राजपुतको बच्चा र आरोपी शिवराजको डीएनए मिल्यो
उच्च अदालतको आदेश : निहारिकाको मुद्दामा डीएनए जाँच गर्नु
निहारिका र सरकारबीच तीन बुँदे सहमति : राजपुतले तोडिन अनशन
