नयाँ दिल्ली, २७ असार । भारतीय प्रधानमन्त्री नरेन्द्र मोदीले सिङ्गापुरका प्रधानमन्त्रीलाई निर्वाचनमा विजयी भएकोमा बधाई ज्ञापन गर्नुभएको छ । शुक्रबार भएको आमनिर्वाचनबाट सिंगापुरका प्रधानमन्त्री लि हसिन लुङ्गको सत्तारुढ दल नै विजयी भएको बताइएको छ । प्रधानमन्त्री लिलाई भारतीय प्रधानमन्त्री मोदीले शनिबार ट्वीट गरेर बधाई दिनुभएको समाचारमा बताइएको छ ।
सिंगापुरमा शुक्रबार सम्पन्न भएको आमनिर्वाचनमा प्रधानमन्त्री लुङ्गको दल विजयी भएको हो । आफ्नो पक्षमा निर्वाचनको नतिजा आएपछि यसलाई सकारात्मक र सन्तोषजनक रुपमा लिएको प्रधानमन्त्री लिले बताउनुभएको छ ।
सत्तारुढ दल पिपल्स एक्सन पार्टी (पिएपी) ले यहाँ दुई तिहाइ बहुमतभन्दा बढी मत प्राप्त गरेको छ । यहाँको विपक्षी दल वकर्स पार्टी (डब्लुपी)ले निकै थोरै मात्रै सिटमा जित्न सफल भएको छ ।
यहाँको सत्तारुढ दल सिंगापुरमा सन् १९५९ देखि नै सत्तामा रहँदै आएको छ । शनिबारको आम निर्वाचनमा कुल मतदातामध्ये ६१.२४ प्रतिशत मात्रै मतदाता सहभागी भएका थिए ।
प्रधानमन्त्री मोदीले सिंगापुरमा लिको आगामी कार्यकाल सफल बन्न सकोस् र उहाँको कार्यकालमा सिंगापुरका नागरिकले सम्पन्नता हासिल गर्न सकुन् भन्ने कामना पनि गर्नुभएको छ ।
कोभिड १९ को महामारी विश्वमा नै कायम रहेका बेला सिंगापुरमा भने आम निर्वाचन सम्पन्न भएको छ । प्रधानमन्त्री लि सिंगापरमा चौथो कार्यकाल प्रधानमन्त्री बन्ने तेस्रो व्यक्ति हुनुभएको पनि समाचारमा उल्लेख गरिएको छ ।
