रौतहटको चन्द्रपुरमा राजपाले कुनैपनि पदमा उम्मेदवारी दिन सकेन

भाद्र २१, रौतहट । तेस्रो चरणमा आगामी असोज २ गते हुने प्रदेश नम्बर–२ को स्थानीय तह निर्वाचनअन्तर्गत् रौतहटको चन्द्रपुर नगरपालिकामा राजपा नेपालले कुनैपनि पदमा उम्मेदवारी दिन सकेन ।

बुधबार भएको उम्मेदवारी मनोनयन दर्तामा सो नगरपालिकामा राष्ट्रिय जनता पार्टी (राजपा) नेपालको तर्फबाट कुनैपनि पदमा मनोनयन दर्ता नभएको हो । यस्तै, गौर नगरपालिकामा नेपाली कांग्रेसले मेयर पदमा उम्मेदवारी दिन सकेन ।

तालमेलका लागि छाडेको भनिएपनि गौरमा कांग्रेसको संगठन कमजोर भएका कारण उम्मेदवारी नै दर्ता नगरेको जनाइएको छ । उपमेयरमा भने कांग्रेसबाट लक्ष्मी बरालको उम्मेदवारी परेको छ । गौरमा एक महिनाअघिमात्रै कांग्रेस परित्याग गरी माओवादीमा प्रवेश गरेका कन्तमणि जैयसवालले स्वतन्त्ररुपमा मेयरमा उम्मेदवारी दिएका छन ।

चन्द्रपुर नगरपालिकामा नेकपा एमालेका उद्धव रेग्मीले विवादका बीच उम्मेदवारी दिएका छन् ।एमालेको केन्द्रीय कमिटी र जिल्ला समितिले बाबुराम दाहाललाई टिकट दिएपनि २ नम्बर प्रदेशका संयोजकले उद्धव रेग्मीलाई टिकट दिएपछि विवाद भएको थियो । रौतहटका अरु स्थानीय तहमा शान्तिपूर्ण रुपमा मनोनयन दर्ता भएको छ ।