![तनहुँको आँधिखोला](https://i0.wp.com/nepalpatra.com/wp-content/uploads/2023/05/Tanahu-Adhikhola-Truck-Accident2332.jpg?fit=960%2C433&ssl=1)
दमौली । पृथ्वी राजमार्गको दमौली मुग्लिङ सडकखण्ड अन्तर्गत आँबुखैरेनी गाउँपालिका-५ आधिखोलामा ट्रकले घरमा ठक्कर दिदाँ ३ जनाको मृत्यु भएको छ भने ५ जना गम्भीर घाइते भएका छन् ।
आज बिहान साँढे ९ बजेको समयमा सडकमा गुडिरहेको ट्रकले घरमा ठक्कर दिदाँ उक्त दुर्घटना हुन पुगेको हो । उक्त दुर्घटनामा घाइतेलाई उपचारका लागि तत्काल आँबुखैरेनी स्थित अस्पतालमा लगिएको भएपनि थप उपचारका लागि चितवनस्थित पुरानो मेडिकल कलेज भरतपुर लगिएको छ ।
जिल्ला प्रहरी कार्यालय तनहुँका अनुसार दुर्घटनामा परी मृत्यु हुनेमा बन्दिपुर गाउँपालिका-१ बस्ने १२ वर्षीय आयुष भुजेल, ५० वर्षीय चेतबहादुर भुजेल र वर्ष ६९ का सनबहादुर भुजेल रहेका छन् ।
उक्त दुर्घटनाका कारण अहिले पृथ्वीराजमार्ग अवरुद्ध हुन पुगेको छ । घटनास्थलमा अहिले ठूलो संख्यामा सुरक्षाकर्मीहरु परिचालन गरिएको छ । घटनाको विषयलाई लिएर स्थानीयहरुले आक्रोश व्यत्तः गरेका छन् ।