बुटवल । रुपन्देही जिल्लामा सवारी दुर्घटना हुँदा ३ जनाको मृत्यु भएको छ भने २ जना गम्भीर घाइते भएका छ्न् । आज सोमबार बिहानै रुपन्देहीको बुटवल उपमहानगरपालिका-१२ स्थित तामनगर ट्रकमा कार ठाेक्किंदा ३ जनाको मृत्यु भएको प्रहरीले बताएको छ ।
बुटवलको तामनगर नजिक कोरियन कलेज अगाडि सडकमा रोकिराखेको लु २ ख ९७७२ नम्बरको ट्रकमा लु ३ च ४४४२ नम्बरको कार ठोक्किंदा कारमा सवार ३ जनाको मृत्यु भएको हो । दुर्घटनामा १ जनाको घटनास्थलमै र अन्य २ जनाको उपचारको क्रममा अस्पतालमा मृत्यु भएको प्रहरीले बताएको छ ।
मृत्यु हुनेहरूमा कारमा सवार बुटवल-१२ बस्ने सविन थारु, सोही स्थानका गोविन्द चौधरी र कार चालक नेवार नविन श्रेष्ठ रहेका छन् । उनीहरूको शव बुटवलको प्रदेशिक अस्पतालमा राखिएको छ ।
दुर्घटनामा परी गम्भीर घाइते २ जनाको लुम्बिनी प्रादेशिक अस्पताल बुटवलमा उपचार भइरहेको छ । घाइतेको सनाखत हुन बाँकी रहेको प्रहरीले बताएको छ । ट्रक चालक फरार रहेका छन् । दुर्घटनाको बारेमा थप अनुसन्धान भइरहेको प्रहरीले जनाएको छ ।
