काठमाडौँ । सर्वोच्च अदालतका १९ जना न्यायाधीशहरुले श्वेतपत्र जारी गर्ने तयारी गरेका छन् । न्यायपालिकाको शुद्धीकरणका लागि भन्दै लगभग ३ सातादेखि आन्दोलनरत सर्वोच्चका न्यायाधीशहरूले श्वेतपत्र जारी गर्ने तयारी गरेका हुन् ।
प्रधानन्यायाधीश चोलेन्द्रशमशेर जबराले राजीनामा दिएर मार्ग प्रशस्त गर्न भन्दै निरन्तर बेञ्च बहिष्कार गर्दै आएका न्यायाधीशहरूले श्वेतपत्र जारी गर्ने तयारी गरेका हुन् । प्रधानन्यायाधीश जबराले राजीनामा नदिने र न्यायाधीशहरूले पनि लगातार बेञ्च बहिष्कार गरिरहँदा जनतामाझ सही सूचना प्रवाह हुन नसकेको भन्दै श्वेतपत्र जारी गर्ने तयारी गरिएको हो ।
न्यायाधीशहरूले श्वेतपत्रमार्फत् आफूहरु किन इजलास बहिष्कार गर्न बाध्य हुनु पर्ने स्थिति आयो र आगामी कदम के हुने भन्नेबारे जनतालाई जानकारी दिन लगिएको हो ।
जारी गर्न लागिएको श्वेतपत्रमार्फत् नै नेपाल बार एशोसिएसन, कर्मचारी प्रशासन, सांसद र सरोकारवाला तथा सेवाग्राहीलाई आफूहरुको आन्दोलनमा साथ दिन आह्वान गर्ने समेत तयारी गरिएको छ ।
