७० करोडको लागतमा यस्तो बन्ने भयो काठमाडौं महानगरपालिकाको भवन Nepalpatra ७० करोडको लागतमा यस्तो बन्ने भयो काठमाडौं महानगरपालिकाको भवन
१४ माघ २०७८, शुक्रबार

७० करोडको लागतमा यस्तो बन्ने भयो काठमाडौं महानगरपालिकाको भवन


काठमाडौं महानगरपालिकाको भवन

काठमाडौं । काठमाडौं महानगरपालिकाले टेकुस्थित आफ्नै जग्गामा मुख्यालय भवनका लागि हिजो सोमबार शिलान्यास गरेको छ । हाल वातावरण व्यवस्थापन विभाग रहेको जग्गामा मेयर विद्यासुन्दर शाक्य र उपमेयर हरिप्रभा खड्गी श्रेष्ठले संयुक्त रूपमा भवनको शिलान्यास गरेका थिए ।

करिब ६ रोपनी क्षेत्रफलमा निर्माण हुन लागेको भवन ३ हजार ८३ दशमलव ८२ क्षेत्रफलमा निर्माण हुनेछ । भवनमा १० व्यक्ति तान्ने क्षमताका दुईवटा लिफ्ट जडान हुनेछन् । भवन आगामी २०८० साल असोज मसान्तसम्ममा निर्माण भइसक्ने बताइएको छ ।

समानान्तर निर्माण सेवा प्रालिले ६९ करोड ५८ लाख १९ हजार ३ सय ५९ रुपियाँमा भवन निर्माणको जिम्मा पाएको छ । भवनको डिजाइन शहरी योजना आयोग र सिनर्जी इन्जिनियरिङ प्रालिले तयार पारेका हुन् ।

करिब ६ रोपनी क्षेत्रफलमा बन्ने भवनको भूमिगत तलामा ३० वटा गाडी र ८० वटा मोटरसाइकल पार्किङ गर्न सकिनेछ । मेकानिकल प्रविधिको प्रयोगबाट भूमिगत तलामा थप २५ वटा गाडी पार्किङ गर्न सकिने पनि बताइएको छ ।

भूकम्प प्रतिरोधी प्रविधिको प्रयोग, वरिपरि खुला ठाउँ र मौलिक वास्तुशैली भवनका मुख्य विशेषता हुन् । प्रत्येक तलामा कार्यालय, बैठक हल, प्रशासन, कर्मचारी, आगन्तुक एवं कार्यालय सञ्चालन र मर्मतका लागि आवश्यक स्थान छुट्याइएको छ ।

भवनमा आकाशेपानी संकलन तथा संकलित पानीको शुद्धीकरण प्रणाली सहितको रिचार्ज पिट डिजाइनमा समावेश गरिएको छ । भवनको जमिन तलादेखि ७ तलासम्म कार्यालय प्रयोजनका लागि प्रयोग हुनेछ भने आठौं तलामा २ सय जना क्षमताको एउटा र १ सय जना क्षमताको एउटा गरी २ वटा छुट्टाछुट्टै सभाकक्ष निर्माण गरिने जनाइएको छ ।

महानगरले १९ वर्षपछि आफ्नै भवन निर्माण शुरु गर्न लागेको हो । नक्सालस्थित अख्तियार दुरुपयोग अनुसन्धान आयोगको भवन निर्माण गरिदिएपछि महानगरले हाल बसेको बाघदरबार भवनको स्वामित्व पाएको थियो ।

महानगरले करिब १० करोड रुपियाँ लागतमा अख्तियार दुरुपयोग अनुसन्धान आयोगको भवन निर्माण गरिदिएपछि सरकारको स्वामित्वमा रहेको सो भवनको भोगचलन गर्ने अधिकार पाएको थियो । २०७२ सालको शक्तिशाली भूकम्पका कारण बाघदरबार क्षतिग्रस्त भएपछि महानगर हालको जेडिए भवनमा सरेको थियो ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !