४ पुस, २०७४ l प्रमूख निर्वाचन आयुक्त अयोधीप्रसाद यादवले हालका संवैधानिक समस्या र राजनीतिक असहमतिहरु तत्काल मिलाउन राजनीतिक दलहरुलाई आग्रह गरेका छन् । मंगलबार ओखलढुंगा सदरमुकाममा चुनावमा खटिएका कर्मचारीहरुलाई धन्यवाद दिंदै यादवले यस्तो आग्रह गरेका हुन् । केही कानुनी समस्या समाधान भइनसकेकोले आयोगले अन्तिम मतपरिणाम नेपाल सरकार र प्रदेश प्रमुखलाई हस्तान्तरण गर्न नसकेको बताए ।
‘यतिखेर अन्तिम मतपरिणाम नेपाल सरकार, सम्मानित राष्ट्रपति र प्रदेश प्रमूखलाई बुझाउनु पर्नेछ,’ यादवले भने, ‘यतिबेला अलिकति राजनीतिक अन्यौलता, संवैधानिक कठिनाई पनि देखिएका छन् । मैला आशा गरेको छु यी सबै कुराको निकास छिट्टै हुन्छ ।’देशमा ठूलठूला समस्या सहमतिबाटै हल भएको कारण यो समस्याको पनि निकासका लागि राजनीतिक दलहरुलाई अग्रसरता लिन उनले आग्रह गरे । यादवले भर्खरै सम्पन्न निर्वाचन विश्व नै चकित हुने गरि शान्तिपूर्ण र सफल रुपमा सम्पन्न भएको समेत बताए ।
‘संसारले हामीलाई हेरिरहेको थियो । हामीले नयाँ संविधानको कार्यान्वयनका लागि गरिने चुनाव कसरी सम्पन्न गर्छौं भनेर,’ यादवले भने, ‘तर सबैले चुनाव हेरिसकेपछि प्रशंसा गरेका छन् । यसको परिणाम स्वीकार्य छ भनेर अन्तर्राष्ट्रिय समुदायले भनिसकेको छ ।’
