६ मङ्सिर, भक्तपुर । एक ५० वर्षीया महिलालाई बलात्कार गरेको अभियोगमा महानगरीय प्रहरीबृत्त थिमिले ५५ वर्षीय पुरुषलाई पक्राउ गरेको छ ।
मध्यपुरथिमि नगरपालिका–६ बाहाखा बजारमा जुत्ताचप्पल पसल सञ्चालन गर्दै आएका मध्यपुरथिमि नगरपालिका–६ बस्ने ५५ वर्षीय कमल श्रेष्ठलाई बलात्कार अभियोगमा प्रहरीले पक्राउ गरेको हो ।
श्रेष्ठले पसल सञ्चालन गर्दै आएको घरमा भाडामा बस्दै आएकी महिलालाई असोज १६ गते श्रेष्ठले पसलभित्र रहेको अर्को कोठामा लगेर जबर्जस्ती बलात्कार गरेको पीडित महिलाले जाहेरी दिएपछि पक्राउ गरी आजै म्याद थप गरी अनुसन्धान शुरु गरेको प्रहरी नायब उपरीक्षक मिलन केसीले जानकारी दिनुभयो ।
टिपर चालक गिरफ्तार
सूर्यविनायक नगरपालिका–२ बालकोटमा गएराति मोटरसाइकलमा सवारको ज्यान जाने गरी ठक्कर दिई फरार रहेका टिपर चालकलाई प्रहरीले पक्राउ गरेको छ ।
महानगरीय प्रहरीपरिषर भक्तपुरका प्रहरी नायब उपरीक्षक रेवतीरमण पोखरेलका अनुसार बा९९प ८२८२ नंको मोटरसाइकललाई ठक्कर दिई फरार ना४ख ८१८२ नंको टिपर चालक काभ्रे रोशी गाउँपालिका–१२ बस्ने २६ वर्षीय अनिल तामाङलाई प्रहरीले पक्राउ गरी प्रहरीवृत्त थिमिको हिरासतमा राखेको उहाँले जानकारी दिनुभयो ।
बालकोट मेरिगोल्ड स्कुल अगाडि टिपरले मोटरसाइकललाई ठक्कर दिँदा मोटरसाइकलमा पछाडि बस्ने महोत्तरी बर्दिवास घर भई ललितपुरको टीकाथली विष्णुटोल बस्ने २४ वर्षीय मनोज मगरको घटनास्थलमै मृत्यु भएको थियो । घटनाबारे थप अनुसन्धान अगाडि बढाएको र दुर्घटनामा परेको टिपर र मोटरसाइकललाई प्रहरीले नियन्त्रणमा लिएको उहाँले जानकारी दिनुभयो । (रासस)
