१० जेठ, काठमाडौं । नेपालमा आज शनिवार दिउसो कोरोना भाइरस (कोभिड-१९) संक्रमण नयाँ ३६ जनामा पुष्टि भएको छ । योसँगै नेपालमा कोरोना संक्रमितको संख्या ५८४ पुगेको छ । स्वास्थ्य तथा जनसंख्या मन्त्रालयमा हुने नियमित पत्रकार ब्रिफिंग गर्दै प्रवक्ता डा. विकास देवकोटाले सो कुराको जानकारी दिएका हुन् ।
मन्त्रालयका प्रवक्ता डा. देवकोटाका अनुसार सेती प्रदेशिक अस्पतालको प्रयोगशाला, कोशी अस्पतालको प्रयोगशाला, राप्ती स्वास्थ्य विज्ञान प्रतिष्ठानमा गरिएको परीक्षणमा थप नयाँ ३६ जनामा कोरोना पुष्टि भएको हो । जस अनुसार बैतडीका ४ जना, झापाका १ जना, बाँकेका २७ जना, बर्दियाका १ जना र सुर्खेतमा ३ जनामा संक्रमण पुष्टि भएको हो ।
आज शनिवार दिउसो थपिएकाहरुमा सेती अस्पतालको प्रयोगशालामा बैतडी जिल्लाको शिवनाथ गाउँपालिका ४ जना छन् । आरडीटी पोजिटिभ भेटिएका २० वर्षका दुई, २२ वर्षीय एक र २७ वर्षीय १ पुरुषको पीसीआर रिपोर्ट समेत पोजिटिभ आएको हो । यसैगरी कोशी अस्पतालको प्रयोगशालामा पीसीआर परीक्षण गराएका झापाको डिल्लीराज मावि क्वारेन्टाइनमा रहेका ३३ वर्षीय पुरुषको रिपोर्ट पोजिटिभ आएको हो ।
साथै राप्ती स्वास्थ्य विज्ञान प्रतिष्ठानको प्रयोगशालामा गरिएको परीक्षणमा बाँकेको नरैनापुर-१ मद्रसाका ६ जना १७ देखि ३२ वर्षका पुरुषमा कोरोना पोजिटिभ देखिएको छ । नरैनापुर-३ बाँकेको राष्ट्रिय प्रावि गोगली १५ जना पोजिटिभ देखिएको छ । उनीहरु १६ देखि ३२ वर्षका पुरुषहरु हुन् । नरैनापुर बाँकेकै ६ जनाको पीसीआर रिपोर्ट पोजिटिभ आएको छ। उनीहरु २२ देखि ५० वर्षका पुरुष छन्। बर्दियाका १९ वर्षीय पुरुष १ जनाको रिपोर्ट पोजिटिभ आएको छ । त्यसैगरी सुर्खेतमा २ जना पुरुष र १ जना महिलाको पीसीआर रिपोर्ट समेत पोजिटिभ आएको छ ।
यसअघि नेपालमा कोरोना संक्रमितको संख्या ५४८ थियो भने आज फेरि दिउसो ३६ जना नयाँ कोरोना भेटिएसंगै नेपालमा कोरोना संक्रमितको संख्या ५८४ पुगेको छ । नेपालमा कोरोनालाई जितेर अस्पतालवाट डिस्चार्ज भई घर फर्किनेको संख्या ७० पुगेको छ । नेपालमा अहिलेसम्म सिन्धुपाल्चोकमा १ जना र बाँकेमा १ जना र गुल्मीको १ जना गरी ३ जनाको मृत्यु भएको छ ।
यो पनि पढ्नुहोस्
नेपालमा संक्रमितको संख्या ५४८ पुग्यो, आज बिहान थपिए कोरोनाका नयाँ ३२ संक्रमित
