नारायणपुर, २४ असार । दाङकाे घोराहीमा फोहरबाट ग्यास उत्पादन गर्नका लागि आवश्यक पूर्वाधार निर्माणको काम सकिएको छ । ग्यास उत्पादनका लागि भने अझै केही समय लाग्ने नेपाल ऊर्जा विकास कम्पनी प्रालिले जनाएको छ ।
यसै वर्ष असार महिनादेखि ग्यास उत्पादन गर्ने लक्ष्य लिइए पनि कोरोना भाइरसको सङ्क्रमण रोक्नका लागि सरकारले गरेको लकडाउनका कारण उत्पादन ढिला भएको हो । ‘पूर्वाधार निर्माण सकिए पनि ग्यास उत्पादनका लागि आवश्यक पर्ने मेसिनरी सामग्री भारतबाट ल्याउनुपर्ने भएकाले ढिला भएको हो’, प्रालिका प्लान्ट म्यानेजर हरिशरण श्रेष्ठले भन्नुभयो । अहिले सामान ल्याउनका लागि प्रक्रिया अगाडि बढाउन पहल गरिएको उहाँको भनाइ छ ।
भारतबाट सामान ल्याएर काम गर्न पाइएमा आगामी कात्तिक अन्तिम साता ग्यास उत्पादन शुरु हुने श्रेष्ठले जानकारी दिनुभयोे । शुरुका दिनमा संरचना निर्माण गर्दा उक्त स्थानमा रहेका रुख कटान तथा त्यसको व्यवस्थापनको प्रक्रियामा समय लागेकाले निर्माण ढिला भएको प्लान्ट म्यानेजर श्रेष्ठको भनाइ छ ।
वैकल्पिक ऊर्जा प्रवद्र्धन केन्द्र, नेपाल उर्जा विकास कम्पनी प्रालि र घोराही उपमहानगरपालिकाबीच त्रिपक्षीय सहकार्यमा फोहरबाट ग्यास उत्पादन गर्न थालिएको हो । त्रिपक्षीय सम्झौता विसं २०७५ मङ्सिर ५ गते भएको थियो । एक वर्षको म्याद भए पनि काम सम्पन्न हुन नसकेकाले उपमहानगरपालिकाले गत चैतसम्मका लागि म्याद थप गरेको थियो । कोरोनाको कारण काम हुन नसकेपछि फेरि कात्तिक मसान्तसम्मका लागि म्याद थप गरिएको उपमहानगरपालिकाका प्रमुख नरुलाल चौधरीले बताउनुभयो । ‘प्लान्ट निर्माणको काम भइसकेको र समय माग गरेकाले थप गरिएको हो’, नगर प्रमुख चौधरीले भन्नुभयो ।
ग्यास उत्पादन गर्न करीब रु २० करोड लगानी लाग्ने जनाइएको छ । सोका लागि ऊर्जा प्रवद्र्धन केन्द्रले ४० प्रतिशत रकम दिने तथा ६० प्रतिशत कम्पनी आफैँले व्यहोर्ने उहाँले बताउनुभयो । संरचना निर्माणका लागि उपमहानगरपालिकाले करीब तीन बिघा जग्गा उपलब्ध गराएको छ । उक्त ग्यास प्लान्ट दुई हजार घन मिटरको छ । दैनिक ७० देखि ८० ग्यास सिलिण्डर उत्पादन गर्ने लक्ष्य लिइएको छ । त्यसबाट प्राङ्गारिक मलसमेत उत्पादन गरिने प्लान्ट म्यानेजर श्रेष्ठले बताउनुभयो ।
ग्यास सिलिण्डर भरेर बजारमा पठाइने छ । कम्पनी र नगरपालिकाबीच २० वर्षको सम्झौता गरिएको छ । सम्झौतानुसार २० वर्षपछि संरचनासहित सबै पूर्वाधार उपमहानगरपालिकालाई हस्तान्तरण गर्ने गरी सम्झौता भएको छ । कम्पनीले उपमहानगरपालिकालाई पाँच प्रतिशत रकम दिनुपर्ने छ भने त्यसपछि सबै संरचना चालु हालतमा हस्तान्तरण गर्नुपर्ने छ । ग्याससँगै प्राङ्गारिक मल उत्पादन गरिने भएपछि फोहर व्यवस्थापनमा समेत सहजता हुने अपेक्षा उपमहानगरपालिकाले राखेको छ ।
