राष्ट्र भयो मोदीमय चर्चा भयो उही कुरो,
यो र त्यो मा अल्मलियौं भेटिनौं है गांठी कुरो,
बिगत कै त्यो नाकाबन्दी त्यसैलाई गिजोलेर,
फेरि पनि नगरौं है बिग्रहको त्यही कुरो ।
भूल कस्को हुंदैन खै दम्भ हुंदा सबै सुरो,
पश्चात्तापले मान्छे बन्छ बुझ्छ पछी सबै कुरो,
मित्रता र सदभावको फेरो फेरी समाएर,
जो जो आउंछन् सबै हाम्रा पाहुना हुन् बुझौं कुरो ।
दुर्छे स्वभाव कतैभए त्यागौं आफ्नो सिङ जुरो,
संधै मिलौं संधै जुटौं मिलाउं हाम्रो मनको कुरो,
स्वतन्त्रता,राष्ट्रियता मुल मन्त्र बनाएर,
मोदीलाई नधिक्कारौं छिमेकी हुन् बुझौं कुरो ।
*धातामणि पोखरेल साहित्यकार हुनुहुन्छ ।
