चाहे मन्दिरमा दियो बाल्नुस् चाहे घाटमा लाश पोल्नुस्
चाहे यज्ञमा चरु होम्नुस् चाहे
चुलोमा दाउरा बाल्नुस चाहे सडकमा टायर बाल्नुस्
लाखबत्ती बाल्नुस कि दागबत्ती दिनुस्,
निस्कने उहीँ धुवाँ र खरानी मात्रै हो ।
त्यस्तै
रिसले घरमा आगो झोस्नुस् कि मन्दिरमा
आक्रोशले स्वास्निको फरिया पोल्नुस कि देशको झण्डा
आवेशमा आफ्नै पैसा जलाउनुस् कि अरुको
झुम्रो पोल्नुस् कि झुप्रो
निस्कने उहीँ धुवाँ र खरानी मात्रै हो ।
जब-जब मान्छे निरीह सोच र निरर्थक विचारबाट कुण्ठित हुन्छ तब तब सबै थोक खरानी हुन्छ ।
लहरमा होस वा लहडमा अबुझ चेतले सब थोक खरानी हुन्छ ।
चाहे त्यो राजनीतिक परिवर्तनका नाममा तोडिएका र फोरिएका भग्नावेश नै किन नहुन् ।
प्रजातन्त्र, बहुदल र गणतन्त्र
नेता, नेतृत्व र नेतृ
मन्त्री, कर्मचारी र हाकिम
शैली, पद्धति र विधि
जहाँ पनि राष्ट्र र राष्ट्रियताका लागि राष्ट्रिय सम्पत्ति खरानी भएका छन् ।
चाहे बिदेशीको ईशारामा होस्
चाहे स्वदेशीको ।
सम्पत्ति हाम्रै खरानी भएका छन् ।
चेतौं बुझौं र सबैले एकै स्वरमा भनौं
खरानी राष्ट्रवाद मुर्दावाद ।
रामचन्द्र तिम्सिना
(आवाज)
