कात्तिक २६,काठमाडौँ। शताब्दीपुरुष सत्यमोहन जोशीले नेपाली कृतिलाई विभिन्न भाषामा अनुवाद गरेर विश्वबजारमा पुर्यापउन सकेमा भविष्यमा नेपालले नोबेल पुरस्कार जित्न सक्ने विचार व्यक्त गरेका छन् ।
शनिबार काठमाडौंमा साहित्यकार भाउपन्थी (तिलकप्रसाद शर्मा खनाल)लाई आख्यानकार ‘शंकर कोइराला स्मृति पुरस्कार’ प्रदान गर्दै उनले नेपालको साहित्य क्षेत्रमा प्रतिभावान मानिसहरु धेरै भए पनि उनीहरुको परिश्रम र मेहनत अझै अपुग रहेको बताए । कलम साहित्य सिर्जनाको शक्ति भएकाले त्यसले सफलता पाउँदैन भन्ने हीनताबोध गर्न नहुने पनि उनको भनाइ थियो ।
उनले साहित्यकार शंकर कोइराला अध्ययनशील, मेहनती र राम्रा साहित्यकार भएपनि आफ्नो जीवनकालमा अवसर पाउन नसकेको बताए । पुरस्कृत व्यक्तित्व भाउपन्थीले साहित्य देशको ऐना भएकाले साहित्यको विकासमा युवावर्ग समर्पित हुनुपर्ने बताए ।
दायित्व वाङ्मय प्रतिष्ठानका अध्यक्ष रामप्रसाद पन्त, सल्लाहकार रामप्रसाद दाहाल, समालोचक कृष्णचन्द्र शर्मालगायतले आख्यानकार कोइरालाको व्यक्तित्वमाथि प्रकाश पार्दै साहित्यले समाजलाई परिवर्तन गर्न सक्ने बताए । ‘शंकर कोइराला स्मृति पुरस्कारको राशि रु १० हजार तथा सम्मानपत्र रहेको छ ।
उपन्यास, नाटक, कथा आदि गरी ५१ ओटा कृति छाडेर गएका कोइरालाले विसं २००३ देखि ५१ वर्ष साहित्य सेवा गरेका थिए । उनको ६७ वर्षको उमेरमा विसं २०५४ मा निधन भएको थियो ।
