भदौ २३, काठमाडौँ । पूर्वकै प्रतिष्ठित शहीद भीमनारायण अन्तर्राष्ट्रिय आमन्त्रण गोल्डकप फुटवल प्रतियोगिताको १३ औं संस्करण आगामी भदौ २७ गतेदेखि सञ्चालन हुने भएको छ ।
हरेक वर्ष वैशाखमा हुने प्रतियोगिता टुँडिखेल मर्मतका कारण यस बर्ष चार महिना पछि हुन लागेको हो । धनकुटा सदरमुकामस्थित तल्लो टंँडिखेलमा हुने प्रतियोगितामा यो पटक ६ टिममात्र सहभागी हुनेछन् ।
प्रतियोगितामा ए डिभिजन क्लव ब्वाईज युनियन, भुटानको बिआरसी भुटान, आयोजकसहित गोधुली क्लव सुनसरी मोरङ्ग–११ तथा झापा–११ को सहभागिता जनाउने आयोजक समितिका सचिव रोशन श्रेष्ठले जानकारी दिए ।
प्रतियोगितामा प्रथम टिमले ट्रफीसहित नगद एक लाख रुपैयाँ पाउने छ भने दोस्रो हुने टोलीले नगद ५० हजार रुपैयाँ पाउने छ । प्रतियोगिता शहीद भीमनारायण श्रेष्ठको नाममा २०५५ सालबाट शुरु गरिएको थियो ।
