काठमाडौं । बलात्कार आरोपमा पक्राउ परेका क्रिकेटर सन्दीप लामिछानेको आज थुनछेक बहस सुरु भएको छ । लामिछानेविरूद्ध दायर भएको मुद्दा हिजो न्यायाधीश माधवप्रसाद घिमिरेको इजलासमा परेकोमा हिजो बयान लिने काम सकिएको थियो ।
लामिछानेको बयान हिजो सकिएसँगै अब आज थुनछेक बहस सुरु भएको काठमाडौं जिल्ला अदालतका प्रवक्ता दीपक दाहालले जानकारी दिए । लामिछानेविरूद्ध सोमबार सरकारी वकिलको कार्यालय काठमाडौंले दायर गरेको मुद्दाको हिजो अदालतमा उनीसँग बयान लिएको थियो ।
काठमाडौं जिल्ला अदालतका न्यायाधीश घिमिरेकै इजलासमा आज थुनछेक बहस सुरु भएको हो । आज सुरूमा सरकारी वकिलले पीडितको पक्षबाट र त्यसपछि सन्दीपका वकिलहरूले बहस गर्ने भएका छन् ।
हिजै थुनछेक बहस पनि हुने बताइएपनि बयान नसकिएकोले आजदेखि मात्र थुनछेक बहस सुरु भएको हो । लामिछानेविरूद्ध १० वर्षदेखि १२ वर्षसम्म कैद सजाय माग गर्दै हिजो काठमाडौं जिल्ला अदालतमा मुद्दा दायर भएको थियो ।
सन्दीपलाई पुर्पक्षका लागि थुनामा राख्ने, तारेखमा छाड्ने वा धरौटमा छाड्ने भन्ने विषयमा थुनछेक बहसपछि अदालतबाट आदेश आउनेछ । अव केही दिनभित्रै अदालतको फैसला आउने सम्भावना रहेको छ ।
लामिछानेलाई मुलुकी अपराध संहिता, २०७४ को दफा २१९ (२) को कसुरको अभियोग लगाइएको हो । दफा २१९ को उपदफा ३ (घ) बमोजिम १० वर्षदेखि १२ वर्षसम्मको कैद माग गर्नुका साथै पीडितलाई उचित क्षतिपूर्ति दिलाउन माग गरिएको छ ।
