१४ माघ, काठमाण्डौ । नेपाली युवा बलर सन्दीप लामिछानेलाई इन्डियन प्रिमियर लिग (आईपीएल) को ११औँ संस्करणका लागि दिल्ली डेयर डेभिल्सले २० लाख भारतीय रुपैयाँमा खरिद गरेको छ । यससँगै सन्दीप आईपीएल टिममा आबद्ध हुने पहिलो नेपाली खेलाडी बनेका छन् ।
जारी आईपीएल अक्सनमा सन्दीप लामिछानेको नाम २७६औँ नम्बरमा सूचीकृत थियो । सन्दीपलाई दिल्लीले वेस प्राइस २० लाख रुपैयाँ बोली लगाएको थियो । अन्य कुनै पनि टिमले मूल्यमा बढाबढ गरेनन् । यसअघि सन्दीप पाकिस्तान सुपर लिग (पीएसएल) र बंगलादेशको घरेलु लिगको ड्राफ्टमा परे पनि अक्सनवाट टिममा छनोट हुन असफल भएका थिए ।
