१५ असार, रसुवा । लाङ्टाङ राष्ट्रिय निकुञ्ज क्षेत्रमा पाल्तु कुकुरले वन्यजन्तुको शिकार गर्न थालेपछि कुकुर नियन्त्रण गर्ने अभियान शुरु गरिएको छ ।
निकुञ्ज कार्यालयका प्रमुख संरक्षण अधिकृत युवराज रेग्मीका अनुसार पाल्तु कुकुरले वन्यजन्तु नोक्सान गर्न थालेपछि नियन्त्रण गर्न नेपाली सेनालाई खटाइएको छ ।
बुधबारदेखि कुकुर नियन्त्रण अभियान थालिएको हो । आहाराको खोजीका लागि पाल्तु कुकुर निकुञ्ज पस्ने गरेका छन् । मृग, घोरल, थार, ब्वाँसोलगायतका वन्यजन्तुको संरक्षणका लागि कुकुर नियन्त्रणमा लिई स्थानान्तरण गर्न लागिएको प्रमुख संरक्षण अधिकृत रेग्मीले बताउनुभयो ।
“लाङ्टाङ क्षेत्रमा वन, वनस्पति र वन्यजन्तुलगायत जैविक विविधता संरक्षणमा विशेष ध्यान दिएका छौँ,” उहाँले भन्नुभयो । निकुञ्ज क्षेत्रको अवलोकन गर्न गत साउनदेखि यही जेठ मसान्तसम्ममा १३ हजार २०८ पर्यटकको आगमन भएको रेग्मीले बताउनुभयो ।
रसुवा, नुवाकोट र सिन्धुपाल्चोकको उच्च भागसम्म फैलिएको निकुञ्जमा ३० भन्दा बढी स्तनधारी वन्यजन्तु पाइन्छ । निकुञ्जको सुरक्षाका लागि नेपाली सेनाको कालीजंग गण तैनाथ छ ।(रासस
