काठमाडौं । संसदीय समितिका सभापतिको निर्वाचनका लागि आज उम्मेदवारी मनोनयन हुँदै छ । संसदीय समितिका सभापतिको लागि उम्मेदवारी आज बिहान ११ः०० देखि दिउँसो ४ः०० बजेसम्म मनोनयन प्रस्ताव दर्ता गराउने समय रहेको हो ।
गत बिहीबार सभामुख देवराज घिमिरेको कार्यकक्षमा बसेको मुख्य चार राजनीतिक दलका प्रमुख सचेतक र सचेतकहरूको बैठकले भोलि भदौ ११ गते १० वटै विषयगत समितिका सभापतिको निर्वाचन गर्ने निर्णय गरेको थियो ।
समितिको कुनै सदस्यलाई सभापतिमा निर्वाचित गरियोस् भनी कुनै अर्का एक सदस्यको समर्थनसहित आज बिहान ११ः०० देखि दिउँसो ४ः०० बजेसम्म उमेदवारी मनोनयन प्रस्ताव दर्ता गराउनसक्ने निर्वाचन कार्यक्रम प्रकाशित गरिएको छ ।
प्रतिनिधिसभाका १० तथा प्रतिनिधिसभा र राष्ट्रियसभाका संयुक्त २ गरी जम्मा १२ वटा समितिका सभापति पदको चयन भोलि हुने भएको हो । संसदीय समितिका बैठक समितिका ज्येष्ठ सदस्यको अध्यक्षतामा बस्ने गरेको छ ।
