![प्रधानमन्त्री प्रचण्ड र विनयमोहन क्वात्रा](https://i0.wp.com/nepalpatra.com/wp-content/uploads/2023/02/PM-Prachanda-and-Vinay-Mohan-Kwatra-in-Baluwatar.jpg?fit=1328%2C883&ssl=1)
काठमाडौँ । प्रधानमन्त्री पुष्पकमल दाहाल ‘प्रचण्ड’ सँग भारतका विदेश सचिव विनयमोहन क्वात्राले शिष्टाचार भेट गरेका छन् । नेपाल भ्रमणमा रहेका भारतीय विदेश सचिव क्वात्राले बालुवाटार पुगेर प्रधानमन्त्री प्रचण्डसँग भेटवार्ता गरेका हुन् ।
प्रधानमन्त्री प्रचण्ड र भारतीय विदेश सचिव क्वात्राबीच भएको भेटवार्तामा ऊर्जा, व्यापार, कनेक्टिभिटी, कृषि, शिक्षा, संस्कृतिका क्षेत्रमा नेपाल–भारत सहकार्यका विषयमा छलफल भएको प्रधानमन्त्रीको सचिवालयले जनाएको छ ।
भारतीय विदेश सचिव क्वात्रा परराष्ट्र सचिव भरतराज पौड्यालको निमन्त्रणामा दुई दिने औपचारिक भ्रमणका लागि सोमबार बिहान नेपाल आइपुगेका हुन् । क्वात्रा नेपाल–भारत परराष्ट्र सचिवस्तरीय संयन्त्रको बैठकमा सहभागी हुन काठमाडौं आइपुगेका हुन् ।
यसअघि उनले सोमबार नै राष्ट्रपति विद्यादेवी भण्डारी र नेपाली कांग्रेसका सभापति शेरबहादुर देउवालाई भेटेका छन् । यस्तै उनले नेपालस्थित परराष्ट्र मन्त्रालयका सचिव भरतराज पौड्याल, परराष्ट्रमन्त्री विमला राई पौड्यालसँग पनि भेट गरिसकेका छन् ।
क्वात्राले मंगलबार पनि राजनीतिक भेटलाई जारी राख्ने भएका छन् । विदेश सचिवको कार्यभार सम्हालेपछिको यो उनको पहिलो नेपाल भ्रमण हो ।