फाइल फोटो 
काठमाडौँ । नेपाली कांग्रेसका उपसभापति धनराज गुरुङले नेताका नाममा खुलेका ट्रस्ट र फाउण्डेसनका नाममा राज्यकोषबाट बजेट हाल्ने र ब्रह्मलुट गर्ने काम भइरहेको पुन: खुलासा गरेका छन् ।
सामाजिक संजाल ट्वीटरमा लेख्दै उपसभापति गुरुङले कुनै पनि नेताहरुको नाममा खोलिएका ट्रस्ट र फाउण्डेसनका लागि राज्यको पैसा हाल्न नहुने बताएका छन् ।
गुरुङले श्रीलंकामा भएको घटनासँग जोड्दै नेताका नाममा खुलेका ट्रस्टमा बजेट लगानी गर्ने काम अहिल्यैबाट छोड्नुपर्ने बताएका छन् । उनले श्रीलंकामा भएको घटनाबाट अचेत नेताहरुको चेत खुल्नुपर्ने बताएका हुन् ।
नेपाली काँग्रेसकै नेता समेत रहेका गण्डकी प्रदेशका मुख्यमन्त्री कृष्णचन्द्र नेपाली पोखरेलले आफ्ना बाबुको नाममा ट्रस्ट खोलेर करोडभन्दा रकम छुट्याएको भन्दै आलोचना भइरहेका बेला गुरुङको यस्तो धारणा सार्वजनिक भएको हो ।
उनले सुशील कोइराला सभापति भएकै बेलाको केन्द्रीय समिति बैठकमा आफूले यो कुरा उठाएको स्मरण गराएका छन् । दक्षिण एसियाको छिमेकी श्रीलंका टाट पल्टिरहँदा पनि नेपाली नेताहरुको चेत नखुलेको भनेर उनी आक्रोशित भएका हुन् ।
उनले ट्वीटरमा लेखेका छन्, ‘सुशील कोइराला सभापति भएकै बेलामा मैले केन्द्रीय समितिको बैठकमा भनेको थिएँ–नेताहरुको नाममा खोलेको ट्रस्ट/फाउन्डेसनहरुमा राज्यकोषबाट बजेट हाल्ने र ब्रह्मलुट गर्ने काम भइरहेको छ। यो भ्रष्टाचार हो । रोक्नु पर्छ ।’
सुशील कोइराला सभापति भएकै बेलामा मैले के.स.बैठकमा भनेको थिएँ "नेताहरुको नाममा खोलेको ट्रष्ट/फाउन्डेसनहरुमा राज्यकोषबाट बजेट हाल्ने र ब्रम्हलुट गर्ने काम भइरहेको छ। यो भ्रष्टाचार हो। रोक्नु पर्छ।"
तर यो प्रबृत्ति झनै बढेको छ। श्रीलंकाको घट्नाबाट अचेत नेताहरुको चेत खुलुस्।— Dhan Raj Gurung (@dhanrgrg) July 10, 2022
