काठमाडौँ । जनता समाजवादी पार्टी (जसपा) का नवनियुक्त तीन जना मन्त्रीहरुको शपथ आजै हुने भएको छ । राष्ट्रपतिको कार्यालयले दिएको जानकारीअनुसार नयाँ मन्त्रीहरुको सपथ आजै साढे चार बजेको समय तय भएको छ ।
राष्ट्रपति विद्यादेवी भण्डारीले प्रधानमन्त्री शेरबहादुर देउवाको सिफारिसमा जसपाका तीन जना नयाँ मन्त्री नियुक्ति गर्दै मन्त्रिपरिषद् पुनर्गठन गरेकी हुन् ।
राष्ट्रपति भण्डारीले प्रधानमन्त्री देउवाको सिफारिसमा जसपाको तर्फबाट इस्तियाक राईलाई भौतिक पुर्वाधार तथा यातायातमन्त्री, प्रदीप यादवलाई वन तथा वातावरणमन्त्री र मृगेन्द्र सिंह यादवलाई कृषि तथा पशुपन्छी विकास मन्त्रीमा नियुक्ति गरेकी हुन् ।
राष्ट्रपति भण्डारीले मौजुदा मन्त्रिपरिषद्मा नेपालको संविधानको धारा ७६ को उपधारा (९) तथा धारा ७८ को उपधारा (१) बमोजिम प्रधानमन्त्रीको सिफारिसमा केही मन्त्रीको नियुक्ति, हेरफेर र कार्यविभाजन गरिएको राष्ट्रपति कार्यालयले जनाएको छ ।
जसपाले कृषिमन्त्री महिन्द्र राय यादव, भौतिक पूर्वाधारमन्त्री रेणु यादव र वनमन्त्री राम सहाय यादवलाई सरकारबाट फिर्ता बोलाएर उनीहरुको ठाउँमा अन्य तीन जनालाई नयाँ मन्त्रीको रुपमा पठाएपछि मन्त्रिपरिषद् पुनर्गठन भएको हो । यद्यपि संघीय मामिला तथा सामान्य प्रशासन मन्त्री राजेन्द्र श्रेष्ठले भने निरन्तरता पाएका छन् ।
