काठमाडौं । प्रतिनिधिसभाको बैठक आज जारी रहेको छ । नयाँ वानेश्वरस्थित संघीय संसदको भवनमा प्रतिनिधिसभाको जारी बैठकमा सार्वजनिक महत्वको प्रस्तावमाथि छलफल भई रहेको हो ।
आजको बैठकमा प्रमुख प्रतिपक्षी दल नेकपा एमालेले जरुरी सार्वजनिक महत्त्वको प्रस्ताव पेश गरेको छ । आज एमालेका सांसद एवं संसदीय दलका मुख्य सचेतक विशाल भट्टराईले इन्धन तथा खाद्यान्नमा भएको मूल्यवृद्धि लगायत जरुरी सार्वजनिक महत्त्वको प्रस्ताव पेश गरेका हुन् ।
यसैगरी अर्थमन्त्री जनार्दन शर्माले आइतबार पेश गरेको आर्थिक वर्ष २०७९/०८० को राजश्व र व्ययको वार्षिक अनुमानमाथि उठेका प्रश्नको जवाफ दिने कार्यसूचीमा रहेको छ । अर्थमन्त्री शर्माले संसदमा १७ खर्ब ९३ अर्ब ८३ करोड रुपैयाँको बजेट प्रस्तुत गरेका थिए ।
प्रतिनिधिसभाको बैठकमा सत्तारुढ दल एवं प्रमुख प्रतिपक्षी दलका सांसदहरुले बजेटमाथि आ-आफ्नो धारणा राखेका थिए । मंगलबारबाट बजेटमाथिको सैद्धान्तिक छलफल सुरु भएको थियो ।
