काठमाडौं । काठमाडौं महानगरपालिकाका नवनिर्वाचित मेयर बालेन साहले प्रधानमन्त्री शेरबहादुर देउवालाई भेटेका छन् । मेयर साहले प्रधानमन्त्रीको सरकारी निवास बालुवाटरामा पुगेर प्रधानमन्त्री देउवालाई भेटेका हुन् ।
भेटमा प्रधानमन्त्री देउवाले महानगरको प्रमुखमा विजयी भएकोमा साहलाई बधाई दिँदै महानगरले गर्ने राम्रा काममा सरकार र नेपाली कांग्रेसको साथ र सहयोग रहने प्रतिबद्धता जनाएका छन् ।
देउवाले बालेनलाई चमत्कार गरेर काठमाडौँको मेयरमा विजय भएकोमा आफू खुशी हुनुको साथै ५ वर्षको कार्यकालमा सरकार र काँग्रेसको पूर्ण समर्थन रहने बताउँदै काठमाडौँ महानगरको विकासको लागि आफूलाई २४ घण्टा नै सम्पर्क सक्ने आश्वाशन समेत दिएका छन् ।
देउवाले काठमाडौँ महानगरको कार्यपालिकामा कांग्रेसको बहुमत रहेको भन्दै विकासको काममा सहयोग हुने बताएका छन् । यस्तै देउवाले काठमाडौँ महानगरको फोहोर व्यवस्थापनका लागि सकेजति उपाय लगाएर अघि बढेमा केन्द्र सरकार, मन्त्रालय, सडक विभाग सबैको सहयोग हुने समेत बताए ।
देउवाले केन्द्र र प्रदेश सरकार साथमा रहेकाले जनताका समस्या समाधानका लागि सहयोग गर्ने प्रतिवद्धता पनि जनाएका थिए । साहले पनि महानगरमा कांग्रेससँग सहकार्य गरेर अघि बढ्ने बताए ।
