फाइल फोटो 
काठमाडौँ । नेकपा (एकीकृत समाजवादी) का अध्यक्ष माधवकुमार नेपालले आगामी वैशाख ३० गते हुने स्थानीय तहको निर्वाचनमा सक्रियतापूर्वक लाग्न आम कार्यकर्तालाई निर्देशन दिएको छन् ।
एकीकृत समाजवादीको पार्टी निकट एकीकृत ट्रेड युनियन महासङ्घ नेपाल (आइसिटियु) घोषणा सभा तथा सम्मान समारोहलाई यहाँ आज सम्बोधन गर्दै अध्यक्ष नेपालल स्थानीय तहको निर्वाचनमा पहिलो पार्टी हुने गरी लाग्न कार्यकर्तालाई निर्देशन दिएका हुन् ।
उनले भने, “सरकारमा सहभागी पार्टीहरूबीच निर्वाचनमा गठबन्धन भयो भने सङ्गठनमा सामेल हुने यदि गठबन्धन भएन भने हामी एक्लै चुनाव लड्दा पनि पहिलो पार्टी हुने गरी अगाडि बढ्नुपर्छ ।”
पूर्वप्रधानमन्त्री नेपालले जनताको हितका निम्ति काम गर्नसमेत कार्यकर्तालाई निर्देशन दिए । उनले एमालेसँगको लडाइँ व्यक्तिगत स्वार्थको लडाइँ नभएर विचार र परिवर्तनकारी र यथास्थितिबाट बीचको लडाइँ भएको प्रस्ट पारे ।
श्रम, रोजगार तथा सामाजिक सुरक्षामन्त्री किसान श्रेष्ठले श्रमिकका आम समस्या समाधान गर्नका लागि जतिसक्दो चाँडो समयअनुसारको श्रम ऐन बनाएर प्रभावकारी कार्यान्वयन गर्ने प्रतिबद्धता व्यक्त गरे ।
उनले श्रमिकहरूलाई गोलबद्ध गर्दै श्रमजीवी वर्गको समृद्धि, भेदभावको अन्त्य, समान अवसर र समानताका लागि सरकार लागिपरेको बताए । पूर्वश्रमन्त्री मुकुन्द नेपालले स्वरोजगार श्रमिकलाई व्यवसाय गर्ने वैकल्पिक तथा उचित व्यवस्था मिलाउन सम्बन्धित निकायमा दबाब सिर्जना गर्नुपर्नेमा जोड दिए ।
महासङ्घले ट्रेड युनियन आन्दोलनमा देखिएको वर्तमान विकृति, विसङ्गति र बेथितिको अन्त्य गरी साँचो अर्थमा मजदुर पक्षीय, जुझारु अनि प्रगतिशील ट्रेड युनियन आन्दोलनको स्थापना विकास र विस्तारमा जोड दिने प्रतिबद्धता जनाएको छ ।
त्यसैगरी महासङ्घले स्वरोजगार श्रमिकको सीप विकास र उनीहरूको संरक्षणका लागि अभियान सञ्चालन गर्ने भएको छ । महासङ्घका अध्यक्ष विष्णु लम्सालले नेकपा (एमाले) जिफन्टले पछिल्ला दिनहरूमा आएर वैचारिक रुपमा कमजोर र श्रमिकका मुद्दा सम्बोधनमा असफल भएको आरोप लगाए ।
