काठमाडौं । एमालेका नेता महेश बस्नेतले युवा संघमा अनावश्यक हस्तक्षेप गरेको भन्दै पार्टी संगठन विभाग प्रमुख खगराज अधिकारीलाई संगठन विभागको जिम्मेवारीबाट मुक्त गर्न माग गरेका छन् ।
आइतबार साँझ सामाजिक सञ्जाल फेसबुकमा नेता बस्नेतले अधिकारीमाथि ७ बुँदे प्रश्न गर्दै उनी संगठन विभाग चलाउन नसक्ने पुष्टि भएको बताएका छन् ।
उनलेे लेखेका छन्,”१) पार्टीको जन वर्गीय संगठनहरु राजनैतिक रूपमा नेकपा (एमाले) लाइन र निर्देशनमा र सांगठनिक रूपमा आफ्नै विधान र स्वायत्त ढङ्गले अगाडी बढ्ने गर्दछन् ।
२) पार्टीको सचिवालयको बैठकले जन संगठन संयोजन संयन्त्रले कार्यविधि पारित गरिसकेपछि सो सँग बाझिने गरी केन्द्रीय कमिटी र पदाधिकारी बनाउन निर्देशन गर्ने अधिकार तपाँईलाई कसले दियो ?
३) युवा संघले सचिवालयको आधिकारिक निर्णयबाट भएका फैसला र जिम्मेवारी पाएका साथीहरूलाई फरक निर्णय गर्ने जिम्मा कसले दियो ?
४) संगठनको इन्चार्ज , अध्यक्ष समेतसँग परामर्श नगरी संगठनको बारेमा विभागको आडमा आदेश दिने न्यायपालिकीय अधिकार कसले दियो ?
५) एमाले बिरुद्ध चौतर्फी आक्रमण भइरहेको बेलामा आन्दोलनको मोर्चा सशक्त ढंगले सम्हालिरहेको युवा संघ माथि अराजकता हाबी हुने र विरोधीहरुको हौसला बढ्ने गरी फैसला किन गर्नु भयो ?
६) छोटो समयको अनुभवबाट भन्न सकिन्छ तपाई संगठन विभाग चलाउन सक्ने व्यक्ति होइन ।
७) तसर्थ क.खगराज अधिकारीलाई संगठनको जिम्मेवारीबाट तत्काल मुक्त गर्न पार्टी नेतृत्वसँग माग गर्दछु ।”
