फाइल फोटो
काठमाडौँ । नेपाली कांग्रेसको १४औँ महाधिवेशनअन्तर्गत सभापति पदका लागि भएको मतगणना सकिएको छ । पहिलो चरणमा कसैले पनि ५० प्रतिशतभन्दा बढी मत नल्याएकोले दोस्रो चरणको मतदान हुने भएको छ ।
पार्टीको केन्द्रीय निर्वाचन समितिका अनुसार मतपरिणामअनुसार प्रधानमन्त्री शेरबहादुर देउवाले अग्रता कायमै राखेपनि सभापतिमा निर्वाचित हुन भने सकेनन् । सभापतिमा निर्वाचित हुन २३४० मत आवश्यक पर्दथ्यो ।
सोमबार बिहानदेखि रातिसम्म भएको मतदानमा जम्मा ४७४३ मतदातामध्ये ४६७९ मतदाताले मतदान गरेका थिए । सभापति देउवाले २२५८, सभापतिका अरु उम्मेदवारहरू क्रमशः डा. शेखर कोइरालाले १७२९, प्रकाशमान सिंहले ३७१, विमलेन्द्र निधिले २४९ र कल्याण गुरूङले २० मत प्राप्त गरेका छन् ।
कांग्रेस विधानअनुसार सभापतिमा निर्वाचित हुन खसेको मतको ५० प्रतिशतभन्दा बढी मत प्राप्त गर्नु अनिवार्य भएकोले कसैले सो मत प्राप्त गर्न नसकेकोले दोस्रो चरणको मतदल हुने भएको हो ।
पहिलोपटक कुनै पनि उम्मेदवारले ५० प्रतिशतभन्दा बढी मत नल्याएमा सबैभन्दा बढी मत ल्याउने दुई जनाबीच पुनः मतदान हुने भएकोले अव देउवा र कोइरालावीच प्रतिष्पर्धा हुने भएको हो । पुनः मतदान हुँदा बढी मत प्राप्त गर्ने उम्मेदवार विजयी हुनेछ । तर पहिलोपटक नै दुई जना मात्र उम्मेदवार भएमा बढी मत ल्याउने उम्मेदवार विजयी हुने विधानमा व्यवस्था छ ।
कांग्रेस केन्द्रीय कार्यसमितिका पदाधिकारी र सदस्य गरी १३२ पदका लागि मतदान भएको थियो । अन्य पदको मतगणना भने सभापति पदको मतगणनापछि पार्टी केन्द्रीय कार्यालयमा गरिने बताइएको छ ।
यो पनि पढ्नुहोस्
४१७४ मत गन्दा देउवाले प्राप्त गरे १९९५ मत, अब ५०० मत गन्न बाँकी
देउवाको अग्रता कायमै, ३१८१ गन्दा देउवाको १७९८, कोइरालाको १४१३ मत
