विराटनगर । प्रदेश १ काे प्रदेशसभा बैठक आज शुरु हुनासाथ स्थगित भएकाे छ । प्रमुख प्रतिपक्षी दल नेकपा एमालेका सांसदरू अनुपस्थित भएपछि सभामुख प्रदीपकुमार भण्डारीले बैठक भाेलि साढे ११ बजे बस्ने गरी स्थगित गरेका हुन् ।
आजकाे बैठकमा मुख्यमन्त्री राजेन्द्रकुमार राईले विश्वासकाे मत लिने कार्यसूची रहेकोमा बैठक स्थगित भएसंगै अव मुख्यमन्त्री राईले भोलि विश्वासकाे मत लिने भएका छन् । नेत्रविक्रम चन्द ‘विप्लव’ समूहले आह्वान गरेकाे नेपाल बन्दका कारण सांसदहरू आउन नसक्ने भन्दै एमालेले बैठक स्थगित गर्न माग गरेकाे थियाे ।
स्थगित नभएमा आफ्ना सांसद बैठकमा सहभागी नहुने समेत एमालेले सचेत गराएको थियाे । यद्यपि एमालेकाे उक्त मागविपरीत प्रदेशसभाकाे बैठक बसेतापनि प्रतिपक्षी सांसद अनुपस्थित भएपछि सभामुख भण्डारीले बैठक स्थगित गरेका हुन् ।
बैठकअघि बसेकाे कार्य व्यवस्था परामर्श समितिकाे बैठकमा एमालेले आजकाे बैठक स्थगित गर्न माग गरेकाे हाे । एमाले प्रमुख सचेतक बुद्धिकुमार राजभण्डारीले आज बैठक बसे एमाले सहभागी नहुने बताएका थिए ।
