![मणि थापा](https://i0.wp.com/nepalpatra.com/wp-content/uploads/Mani-Thapa-3.jpg?fit=1300%2C550&ssl=1)
काठमाडौं । मेलम्ची खानेपानीको काठमाडौंमा आज औपचारिक उद्घाटन भएको छ । काठमाडौंको भृकुटीमण्डपमा नवनिर्मित सार्वजनिक ढुंगेधाराको टुटी खोलेर राष्ट्रपति विद्यादेवी भण्डारीले मेलम्चीको खानेपानीको उद्घाटन गरेकी हुन् ।
कार्यक्रममा प्रधानमन्त्री केपी शर्मा ओली लगायत धेरैजसो मन्त्रीहरु पनि सहभागी भएका थिए । तर यस्तो ठुलो राष्ट्रिय गौरवको आयोजनाको औपचारिक उद्घाटन समारोहमा सम्वन्धित खानेपानीमन्त्री मणी थापा भने उपस्थित भएनन् ।
कार्यक्रम उद्घोषिकाले मन्त्रीको स्वास्थ्यमा देखिएको समस्याका कारण अनुपस्थित रहेको जानकारी गराईन । कस्तो दुर्भाग्य ! बिरामी भएर ऐतिहासिक अवसर खानेपानीमन्त्री थापाले गुमाएका छन् ।
तर खानेपानी मन्त्री थापाको उद्घाटन मन्तव्य भिडियो मार्फत प्रशारण भने गराइएको थियो । खानेपानी मन्त्री भएपछि मन्त्री थापा मेलम्ची खानेपानीका लागि धेरै नै सक्रिय भएर आयोजनालाई सफलताको बिन्दुमा ल्याउन ठुलो भूमिका निर्वाह समेत गरेका थिए ।
राष्ट्रपति भण्डारीले औपचारिक वितरणको सुरुवात गरेतापनि बिडम्बनाको कुरा अहोरात्र खटेर आज काठमाडौंमा खानेपानी वितरणका लागि औपचारिक उद्घाटन समारोहमा भने मन्त्री थापा उपस्थित हुन सकेनन् । पारिवारिक स्रोतले दिएको जानकारी अनुसार मन्त्री थापा ३ दिनदेखि हल्का बिसञ्चो भएका थिए ।
उनलाई आज बिहानदेखि बढी नै अवस्था केहि जटिल भएपछि कार्यक्रममा अनुपस्थित भएका हुन् । खाना खान मन नलाग्ने, टाउको दुख्ने समस्याका कारण अहिले मन्त्री थापा निवासमै आराम गरिरहेका छन् । थाेरै विसञ्चाे महसुस भएपछि आज दिउसो कोरोना संक्रमणको आशंकामा उनले काेभिड-१९ परिक्षणका लागि स्वाब समेत दिएका छन् ।
मेलम्ची खानेपानी आयोजना अन्तर्गत निर्देशनालयले भृकुटीमण्डपमा बनाएका ढुंगेधारामा रहेको ३ वटा धारा खोलेर राष्ट्रपति भण्डारीले उद्घाटन गरेकी हुन् । गत आइतबार काठमाडौंमा भित्रिएको मेलम्ची खानेपानीको औपचारिक उद्घाटन आज गरिएको हो ।
आजदेखि सर्वसाधारणले भृकुटीमण्डपमा रहेको सार्वजनिक ढुंगेधाराबाट पानी खान पाउनेछन् । काठमाडौं उपत्यकाका सर्वसाधरणले आइतबारदेखि नै मेलम्चीको पानी खान थालिसकेका छन् ।
हालसम्म काठमाडौंको महाङ्काल, मीनभवन र खुमलटारको ट्याङ्कीबाट पानी वितरण भएको छ । यसैबीच काठमाडौं उपत्यका खानेपानी लिमिटेडले बालाजु पोखरीमा मेलम्चीको पानी हालेर त्यस क्षेत्रमा पानी वितरण शुरू गरेको छ ।
हाल पुरानो पाइपलाइनबाट पानी वितरण भइरहेको आयोजनाले जनाएको छ । १ महिनासम्म पुरानो पाईपमा पानी पठाएपछि बैशाख १५ पछि नयाँ पाइपलाइनमा पानी पठाउने तयारी भएको छ ।