काठमाडौं । प्रधानमन्त्री समेत रहेका नेकपा एमाले अध्यक्ष केपी शर्मा ओलीले खनाल-नेपाल समूह चैत ७ गते बालुवाटारमा बोलाइएको केन्द्रीय समिति बैठकमा अनुपस्थित भए स्वाभाविक रुपमा कदम चालिने बताएतापनि उनले कस्तो कदम चालिने भन्नेबारे प्रष्ट बताएनन् ।
हिजो आइतबार राति प्राइम टाईम्स टेलिभिजनबाट प्रसारण भएको जनता जान्न चाहन्छन् कार्यक्रममा बरिष्ठ पत्रकार ऋषि धमलासँग कुरा गर्दै उनले आफूले चैत्र ७ गते बोलाएकोले सबैलाई आउन निर्देशन दिएका छन् । साथै प्रधानमन्त्री ओलीले आफूले पार्टीको बैठक जहाँ बोलाएपनि त्यहाँ सबै नेताहरु आउनुपर्ने बताएका छन् ।
पत्रकार धमलाले के खनाल-नेपाल समूहलाई बैठकमा सहभागी नभए कारबाही गर्नुहुन्छ भन्ने प्रश्नको उत्तर दिदै प्रधानमन्त्री ओलीले भने, ‘त्यो मैले चाल्ने कदम होइन, केन्द्रीय समितिले जे भन्छ त्यही अनुसार हुन्छ । उहाँ आउनु भएन भने गलय हुनुहुन्छ ।’
उक्त अन्तरवार्तामा उनले बाहिर-बाहिर चर्को कुरा गरेर हिँडेर केही नहुने भन्दै केही कुरा भए केन्द्रीय समिति बैठकमा आएर छलफल गर्न सकिने बताएतापनि यसबीचमा नेपाल समूहले गरेका गल्तीहरु महसुश गर्नुपर्ने पनि बताए ।
तर, वरिष्ठ नेताहरु माधव नेपाल र झलनाथ खनालहरुले त बालुवाटारमा बोलाईएको बैठकमा कुनै पनि हालतमा नजाने भनेर भनिसक्नुभएको छ नि ? भनेर पत्रकार धमलाले सोधेको प्रश्नमा उनले भने,”बैठक मैले जहाँ बोलाउँछु, त्यहीँ हुन्छ । बालुवाटारको बैठकमा नआउनेहरु पेरिसडाँडा जानुहोस न त । सर्वोच्च अदालतले पनि तिम्रो पार्टी बालुवाटारमा छ भन्दिएको छ । पार्टीको बैठकमा आउनुपर्यो नि । बैठकमा आउनुपर्यो अनि गल्ती भयो, त्रुटि भयो भनेर महसुस गर्नुपर्यो ।”
