६ भदौ, रसुवा । गोसाइँकुण्ड मेलालाई केन्द्रित गरी गोसाइँकुण्डलगायत आवश्यक स्थानमा आजदेखि निःशुल्क स्वास्थ्य शिविर सञ्चालन भएको छ ।
गोसाइँकुण्ड क्षेत्र विकास समितिका अध्यक्ष सञ्जीव डिएमका अनुसार धार्मिक मार्गका गोसाइँकुण्डमा हिमालय उद्धार सङ्घ, लौरीविनायकमा अक्सफोर्ड युनिभर्सिटी क्लिनिक रिसर्च युनिटअन्तर्गतको पाटन स्वास्थ्य विज्ञान प्रतिष्ठान, गणेश गौँडामा सक्षम नेपाल नामक, चोलाङ्पाटी र चन्दनबारीमा लाङ्टाङ राष्ट्रिय निकुञ्जको सुरक्षामा तैनाथ नेपाली सेना कालीजङ्ग गणले स्वास्थ्य शिविर शुरु गरेको बताइएको छ ।
पौराणिक कथनअनुसार समुद्रमन्थन गर्दा कालकूट विष निस्केको र त्यसले संसार दग्ध गर्न आँटेकाले देवताहरूको आग्रहमा महादेव सो विष पिईँ सबै प्राणीजगत्को रक्षा गरेका थिए । विषको असरले डाहा भएपछि शीतलता खोज्दै शङ्करले गोसाइँकुण्डमा विश्राम लिएको जनविश्वास छ । त्यसैले उहाँको दर्शनार्थ हरेक वर्ष दशहरा र जनैपूर्णिमामा गोसाइँकुण्ड पुगी नीलकण्ठ दहमा स्नान गरेर पूजाराधना गर्ने चलन छ ।
समुद्री सतहदेखि चौध हजार १०० फिट उचाइमा रहेको कुण्डमा अहिले पनि शिव विराजमान रहेको बताइन्छ ।
गोसाइँकुण्डको पूजाराधना गर्नाले आफ्नो मनोकांक्षा पूरा हुने जनविश्वास छ । काठमाडौंको गँगबु बसपार्कबाट नुवाकोटका त्रिशूली, ढुङ्गे, उत्तरगया (वेत्रावती), धैबुङ, कालिकास्थान हुँदै धुञ्चेसम्म एकदिनको मोटरयात्रा र त्यहाँबाट एक दिनको पैदलयात्रापछि भक्तजन सुलाद्रि पहाड, चन्दनबारी हुँदै नीलाद्रीको फेदीमा अवस्थित पौराणिक महत्वको गोसाइँकुण्ड पुग्ने गरेका छन् । गोसाइँकुण्डमा भाद्र शुक्ल पूर्णिमाको दिन पूजाराधना र पितृ तर्पण गर्नाले दिवङ्गत पितृको आत्मालाई शान्ति मिल्ने विश्वाससमेत रहिआएको छ ।
स्वास्थ्य शिविर गोसाइँकुण्डमा अक्सिजनसहित छ चिकित्सकको समूहले निःशुल्क उपचार सेवा दिइरहेको समितिले जनाएको छ । नेपाली सेनाले भने आफ्ना चिकित्सकद्वारा तीन दिन अगाडिदेखि उपचार सेवा प्रदान गरिरहेको र उद्धार टोलीसमेत तैनाथ गरेको कालीजङ्ग गणले जनाएको छ ।
गोसाइँकुण्ड जाने धार्मिक मार्ग सरसफाइ र मर्मत तथा होटल र लजको व्यवस्थापनसमेत भइसकेकाले यात्रुलाई खानबस्न कुनै समस्या नपर्ने अध्यक्ष डिएमले जानकारी दिनुभयो ।
नुवाकोटमा पुल भत्किएका स्थानमा सडक कार्यालयले वैकल्पिक व्यवस्था मिलाइसकेकाले काठमाडौँबाट गएका मोटर सीधै धुञ्चे पुग्नेछ । गोसाइँकुण्ड मेलाका लागि व्यवस्थापन भैसकेका अवस्थामा पुलको निहुँ बनाई केही सञ्चारमाध्यमले मेला प्रभावित भने पनि निर्धक्कताका साथ गोसाइँकुण्ड यात्रा गर्न समितिका अध्यक्ष डिएमले आग्रह गर्नुभयो ।
पुत्रदा एकादशी पर्व (भदौ ६)देखि शुरु भएको मेलामा हाल ५०० भन्दा बढी भक्तजन गोसाइँकुण्ड पुगिसकेका छन् । यही भदौ १० गते जनैपूर्णिमाका लागि १४ हजार पाँच सय भक्तजन गोसाइँकुण्ड पुग्ने लक्ष्य राखिएको बताइएको छ । स्थायी होटलको अलावा बास बस्नका लागि यथेष्ट अस्थायी छाप्राको व्यवस्थापन भइसकेको र जति भक्तजन आए पनि खानबस्न समस्या नहुने समितिका कोषाध्यक्ष निमा तमाङले जानकारी दिनुभयो । (रासस)
