२२ असार, विराटनगर । नेपाल कम्युनिष्ट पार्टी ( नेकपा)का वरिष्ठ नेता माधवकुमार नेपालले निर्वाचन आचारसंहिता विपरीत तत्कालीन सरकारले गरेको निर्णय वर्तमान सरकारले खारेज गर्नु उचित भएको बताउनुभएको छ ।
विराटनगर विमानस्थलमा आज सञ्चारकर्मीसँग कुराकानी गर्दै उहाँले भन्नुभयो, “तत्कालीन सरकारले गरेको निर्णय खारेज गर्ने वर्तमान सरकारको निर्णयबाट मुलुकमा प्रणालीको विकास शुरु भएको छ ।”
पूर्वप्रधानमन्त्रीसमेत रहनुभएका नेता नेपालले संक्रमणकालमा गरिने निर्णय सहमति र सहकार्यमा नगरिएकाले बहुमतको वर्तमान निर्वाचित सरकारले खारेज गरेको उल्लेख गर्दै डा गोविन्द केसीको भूमिका र उठाएको माग सम्बोधन गर्न गाह्रो भएको बताउनुभयो ।
राष्ट्रिय नेता मनमोहनको नाममा स्थापना भएका संस्था बन्द गर्ने र करोडांै रुपैयाँ खर्चिएर नेपाली विद्यार्थीलाई विदेश अध्ययन गर्न पठाउने उद्देश्य राम्रो होइन भन्दै उहाँले अनसन त्यागेर शिक्षा र स्वास्थ्यका समस्या समाधान गर्न सरकारसँग वार्तामा आउन उहाँलाई आग्रह गर्नुभयो ।
नेता नेपालले शिक्षा र स्वास्थ्य क्षेत्रमा भइरहेको व्यापारीकरण रोक्न वर्तमान सरकार कटिबद्ध रहेको चर्चा गर्दै जनताको शिक्षा र स्वास्थ्यको दायित्व सरकारले लिने बताउनुभयो ।
क्षणिक आवेशमा नआउन र जिम्मेवार प्रतिपक्षको भूमिका निर्वाह गर्न नेपाली काँग्रेसलाई आग्रह गर्दै उहाँले प्रतिपक्षले वर्तमान सरकारलाई कार्य गर्न नदिने गरी गरिएको निर्णयले उल्टै नेपाली काँग्रेसप्रति नै जनताले आरोप लगाउने धारणा व्यक्त गर्नुभयो ।
नेता नेपालले मुलुकका गरिबी, बेरोजगारी, अभाव र पछौटेपन जस्ता समस्या समाधान गर्न सत्तापक्ष र प्रतिपक्षबीच सहकार्य गरी समृद्ध नेपाल, सुखी नेपाली बनाउनेतर्फ लाग्न पनि काँग्रेसलाई आग्रह गर्नुभयो ।
जनताको विश्वास जित्न कार्यकर्तालाई सुझाव
यसैगरी नेपाल कम्युनिष्ट पार्टीका नेता माधवकुमार नेपालले पार्टीका कार्यकर्तालाई जनताको मन र विश्वास जित्नका लागि अग्रसर हुन सुझाव दिनुभएको छ ।
विराटनगरस्थित पार्टी कार्यालयमा आज पार्टीका अगुवा कार्यकर्तालाई सम्बोधन गर्दै उहाँले आफ्नो भूमिकालाई कुशलता र क्षमतालाई सदुपयोग गरेर जनताको समस्यालाई समाधान गर्न इमान्दारीपूर्वक लाग्नुपर्नेमा जोड दिनुभयो ।
नेता नेपालले दुई विशाल पार्टीको एकताबाट सिङ्गो मुलुकका साथै अन्तर्राष्ट्रिय क्षेत्रसमेत तरङ्गित एवं उत्साहित भएको उल्लेख गर्दै मुलुक सञ्चालनको जिम्मेवारीसमेत अहिले पार्टीको काँधमाथि आएकाले कार्यकर्ताको दायित्व अझै बढेको बताउनुभयो ।
पार्टी एकतापछि साङ्गठनिक संरचनाका काम केन्द्रमा पनि पूर्णरुपमा हुन नपाएको र तीन महिनासम्ममा प्रदेशलगायत जिल्लास्तर संगठनका कार्य पूरा हुने विश्वास व्यक्त गर्दै उहाँले समृद्ध मुलुक निर्माणका लागि सबै अग्रसर हुनुपर्ने बताउनुभयो । (रासस)
