१४ फागुन, काठमाडौं । पुतलीसडकको शेयर मार्केटमा भिषण आगलागी भएको छ । भवनकाे चाैथाे तल्लामा रहेको एनआईसी ट्रेडिङ सेन्टरमा साेमबार बिहान साढे ९ बजे आगलागी भएको हो ।
नजिकैको उपत्यका ट्राफिक कार्यालयका एक ट्राफिक अधिकारीको जानकारी अनुसार २ वटा दमकलले आगो निभाई रहेका छन् भने थप २ वटा दमकल झिकाइएको थियो । पुतलीसडकको दुवैतर्फको सडक अवरुद्ध भएको छ । आगो सेयर मार्केट लगायत वरिपरिका ३ घरमा समेत फैलिएको छ ।
आगो काठमाडौं महानगरपालिकासँगै नेपाली सेनाको दमकल, प्रहरी र स्थानीयको प्रयासमा केहीबेर पछि नै नियन्त्रणमा आएकाले ठूलाे क्षति हुनबाट जाेगिएकाे छ । प्रहरीले आगो लाग्नुको कारण र क्षतिको विवरण प्राप्त भई नसकेको जनाएको छ ।
