६ चैत, काठमाण्डौ । गत हप्ता भएको यूएस-बांग्ला विमान दुर्घटनामा ज्यान गुमाएका मध्ये ४६ जनाको पहिचान भएको र तीमध्ये प्राय: सबैको शव हस्तान्तरण भइसकेको अधिकारीहरूले बताएका छन् ।
तेइस जना बांग्लादेशी यात्रुको शव आज ढाका पठाइएको तथा २१ जना नेपालीको शव आफन्तले बुझिसकेका छन् ।
यस्तै दुर्घटनामा परेर घाइते भएका २० जना मध्ये हाल नेपालका विभिन्न अस्पातालमा पाँच जनाले मात्रै उपचार गराइरहेको विमान कम्पनीले जनाएको छ ।
विमान दुर्घटना भएको झन्डै एक सातामा परिवारजनले मृतकहरूका शव पाएका हुन् । दुर्घटनालगत्तै आगो लागेकाले अधिकांश शव चिन्न नसक्ने अवस्थामा रहेको बताइएको थियो ।
त्रिभुवन विश्वविद्यालय शिक्षण अस्पतालका फोरेन्सिक विभागका चिकित्सक हरिहर वस्तीका अनुसार शवपरीक्षण तथा अन्य विवरणहरूका आधारमा ४६ वटा शवको पहिचान भएको बिबिसीले बताएको छ ।
वस्तीले भने,”बांग्लादेश दूतावासमार्फत् २३ वटा शव परिवारले बुझेर लगिसके। एकजना नेपालीका आफन्त विदेशबाट आउने भएकाले उनको शव अस्पतालमै राखिएको छ। अरूको त दाहसंस्कार नै भइसक्यो ।”
उनका अनुसार दुर्घटनामा परेका अर्का चिनियाँ नागरिकको शव पनि हस्तान्तरण भइसक्यो ।
पहिचान हुन बाँकी रहेका तीन जना बांग्लादेशी नागरिकबारे थप विवरण तिनका परिवारसँग मागिएको छ ।
वस्तीका अनुसार विवरण आएपछि डीएनए परीक्षण गर्नु पर्ने वा नपर्नेबारे निर्णय लिइने छ ।
वस्तीले भने, “पहिचान हुन बाँकी रहेका परिवारका सदस्यले कुरा बुझेर गएका छन् । परिवारका अन्य सदस्यको सहयोगले थप सूचना र विवरण पठाए भने डीएनए परीक्षण नगरी उनीहरूको पनि अरूको जस्तै पहिचान हुन सक्छ। त्यो विवरणको पर्खाइमा छौँ ।
यो पनि पढ्नुहोस् :
यूएस बंगलाको विमान दुर्घटना : ५१ को मृत्यु, २० घाइते
बिमान दुर्घटनामा मृत्यु भएका बंगलदेशी नागरिकको शव आज बंगलादेश लैजादै
