काठमाडौँ, ३१ जेठ । पल्सर स्पोर्टस् अवार्डका लागि नेपाल खेलकूद पत्रकार मञ्च (एनएसजेएफ)लाई डिसहोम मिडिया नेटवर्क लिमिटेडले रु ११ लाख बराबरको रकम सहयोग गर्ने भएको छ । आगामी असार १७ गते आयोजना हुने उक्त अवार्डका लागि मञ्चले डिस होमसँग सम्झौता नवीकरण गरेको हो ।
मञ्चका अध्यक्ष दुर्गानाथ सुवेदी र डिस होमका प्रबन्ध निर्देशक सुदीप आचार्यले यहाँ आज आयोजित कार्यक्रममा सम्झौतापत्रमा हस्ताक्षर गर्नुभयो । सम्झौतानुसार डिस होमले अवार्डका लागि रु सात लाख र चार लाख बराबरको डिस होमको सामग्री उपलब्ध गराउनेछ ।
त्यस्तै अब अवार्डको नाम ‘बजाज पल्सर स्पोर्ट्स अवार्ड इन एशोसियसन विथ डिस होम एक्सन स्पोर्टस’ हुनेछ । मञ्चले यसपटक १० विधामा अवार्ड प्रदान गर्ने भएको छ । सोअन्तर्गत पिपल्स च्वाइस, उत्कृष्ट खेलाडी पुरुष, उत्कृष्ट खेलाडी महिला, युवा वर्ष खेलाडी, प्रशिक्षक, पारा एथलिट, स्पेशल अवार्ड, लाइफटाइम एचिभमेन्ट अवार्ड, टिम अफ द इयर र इन्टरनेशनल एशियन स्पोर्टस् जर्नलिस्ट अवार्ड छन् ।
वर्ष खेलाडी पुरुष र महिला, पिपल्स च्वाइस र प्रशिक्षक गरी चार विधाका विजेताले बजाज पल्सर मोटरसाइकल प्राप्त गर्नेछन् भने अन्य विधाका विजेताले जनही रु ५० हजारसहित विभिन्न उपहार प्राप्त गर्नेछन् । मञ्चले पिपुल्स च्वाइस अवार्ड विधाका लागि यसअघि नै पाँच खेलाडीको नाम सार्वजनिक गरिसकेको छ । तिनमा क्रिकेटका सन्दीप लामिछाने, भलिबलकी रेश्मा भण्डारी, ब्याटमिन्टनका प्रिन्स दाहाल, फुटबलकी सावित्रा भण्डारी र शारीरिक सुगठनका महेश्वर महर्जन छन् ।
नेपाल चार स्थान तल
फिफा वरियतामा नेपाल चार स्थान तल झरेको छ । विश्व फुटबलको सर्वोच्च निकाय फिफाले आज सार्वजनिक गरेको नयाँ वरियतामा नेपाल चार स्थान तल झर्दै १६५औँ स्थानमा रहेको हो । यसअघि नेपाल १६१औँ स्थानमा थियो ।
चार स्थान तल झरेको नेपाल दक्षिण एशियामा भने तेस्रो स्थानमा छ । नेपालभन्दा माथि भारत १०१ औँ स्थानमा छ भने माल्दिभ्स १५१ औँ स्थानमा रहेको छ । नेपालभन्दा तल रहेको बङ्गलादेश १८३औँ स्थानमा छ भने भूटान १८६औँ स्थानमा छ । त्यसैगरी श्रीलङ्का २०१ तथा पाकिस्तान २०३औँ स्थानमा रहेको छ । विश्व वरियतामा बेल्जियम भने शीर्ष स्थानमा यथावत् नै छ । फ्रान्स दोस्रो तथा ब्राजिल तेस्रो स्थानमा छ ।(रासस)
