China Flag 
५ पुस, बेइजिङ । चीनको राज्य–नियन्त्रित कम्पनीले अमेरिकी भटमास (सोयाबिन) पुनः खरिद गर्न थालेको बताएको छ । यसै महिना अमेरिकासँग ९० दिने व्यापारिक युद्धविराम भएसँगै चीनले अमेरिकी सोयाबिन खरिद गर्न थालेको हो ।
व्यापार विवाद सुल्झाउने उद्देश्यले अमेरिकी राष्ट्रपति डोनाल्ड ट्रम्प र चिनीया राष्ट्रपति सी जिनपिङबीच डिसेम्बर १ मा भएको सम्झौता भएसँगै त्यस सम्बन्धमा सकारात्मक सङ्केत गर्ने उद्देश्यले चीनले अमेरिकी सोयाबिन खरिद गर्न थालेको विश्लेषकहरुले जनाएका छन् ।
“दुबै नेताबीच भएको सहमतिको कार्यान्वयनका लागि हाम्रो कम्पनीले अमेरिकाबाट केही सोयाबिन खरिद गर्न थालिएको हो,” चाइना ग्रेन रिजर्भ करपोरेसन अर्थात साइनोग्रेनले बुधबार प्रकाशन गरेको वक्तव्यमा उल्लेख छ ।
ट्रम्प र सीले ब्युनस आयर्समा सम्पन्न जी–२० शिखर बैठकका क्रममा दुबै मुलुकबीच उत्पन्न व्यापारिक तनाब कम गर्न ९० दिने युद्धविराम गरेका थिए । उक्त सहमति पश्चात् करवृद्धिका थप घोषणा र चेतावनी आएका छैनन् ।
अमेरिकाले सयौं अर्ब डलर बराबरका चिनीया सामानमा करवृद्धिको घोषणा गरेसँगै चीनले पनि प्रतिशोध स्वरुप अमेरिकामा उत्पादित सोयाबिनमा करवृद्धि गरेको थियो । चीनको उक्त निर्णयका कारण अमेरिकी कृषकहरु ठूलो समस्यामा परेका थिए ।
दुबै देशबीच जनवरीदेखि व्यापार वार्ता हुँदैछन् । चीनले अमेरिकामा निर्मित कार र कारका सामानमा यही जनवरी १ बाट लागू हुनेगरी तीन महिनाका लागि अतिरिक्त कर नलिने घोषणा गरेको छ । चीनको पछिल्लो कदमले व्यापार मध्यस्थ वार्ता सकारात्मक रुपमा अघि बढ्ने देखाएको छ ।
यसबीच, चीन र अमेरिकाका उच्च व्यापार प्रतिनिधिबीच वार्ताका विषयमा टेलिफोनमा कुराकानी भएका छन् । (रासस/एएफपी)
